Politistøðin í Klaksvík er undir trýsti. Ov fá fólk, miðsavnað vaktarætlan og minni tíð á gøtuni fáa nú hvassar átalur.
Í fakblaðnum Dansk Politi, sum verður givið út av danska Politiforbundet, verður varpað ljós á støðuna á politistøðini í Klaksvík.
Jan Poulsen, leiðari á politistøðini í Klaksvík, sigur, at støðin hevur 12 løgreglufólk og ein leiðara – men minst 14 fólk skulu til, um trýskiftis-skipanin skal rigga.
Síðani mars 2025 hevur Tórshavn tikið yvir vaktplanleggingina og stóran part av uppgávubýtinum.
– Vit mangla løgreglufólk, og arbeiðsgleðin er í botni, sigur Jan Poulsen.
Sambært honum eru løgreglufólkini farin frá meira sjálvstøðugum og fyribyrgjandi arbeiði til at renna eftir uppgávum, sum verða sendar úr Havn.
Álitismaðurin Heri Hansen sigur, at borgararnir longu merkja avleiðingarnar.
– Vit eru heilt einfalt minni sjónlig fyri borgarunum, sum sakna okkum, sigur hann.
Og hann leggur dent á:
– Tað er Føroya politi, ikki Tórshavnar politi.
Leiðslan í Tórshavn viðurkennir trupulleikarnar, men ætlar ikki at lata vaktarplanleggingina aftur til Klaksvíkar.
Kjakið um miðsavningina er tí langt frá avgreitt.
