Starv sum biologassistentur

Dámar tær at putlast, men eisini at rokast av og á? Heldur tú at fiskiskapur ella lívið í sjónum eru áhugaverd? Nú er eitt fjølbroytt starv sum biologassistentur leyst at søkja á Tilfeingisdeildini hjá okkum.

Starvsstaðið er á Havstovuni og umborð á havrann­sóknar­skip­inum Jákup Sverra.

Kjarnuvirksemið á Tilfeingisdeildini á Havstovuni er at fylgja við gongdini í fiskastovnum, sum føroyska samfelagið hevur áhuga í. Á deildini starvast 17 fólk við ymsari bakgrund og arbeiðsuppgávum – bæði frøðingar og biologassistentar.

Biologassistentarnir á Havstovuni røkja nógv ymisk arbeiði – alt frá lívligari prøvatøku til stillisliga aldurslesing og mennandi toymisuppgávur. Í stóran mun er talan um afturvendandi upp­gávur ár um ár.

Arbeiðsøkið

• Tú verður biologassistentur á Tilfeingisdeildini. Høvuðs­arbeiðið er fiskakanningar.
• Tú fert at aldursgreina fisk í toymi við øðrum biolog­assistent­um. Eisini fert tú at taka prøvar av fiski bæði á rann­sóknar­skipi, á Havstovuni og møguliga á landingar­móttøk­um kring landið.
• Tú fert at sigla við Jákup Sverra á ymiskum rann­sóknar­túr­um, har arbeiðið kann vera fysiskt krevjandi.
• Tað kann henda, at tú skalt við øðrum skipum at gera kanning­ar­arbeiði.
• Tú eigur at rokna við, at tíðin umborð á skipi tekur upp til tveir mánaðir spjatt yvir árið.
• Tú fert at gera annað fyrifallandi arbeiði eisini.

Setanartreytir

Ongin beinleiðis treyt er til útbúgving. Tó eru starvsstovuroyndir, royndir til sjós, styttri útbúgving innan lívfrøði ella tilfeingi – ella bert áhugi fyri havlívfrøði góður førningur til starvið sum biologassistentur.

Góð evni at samstarva er ein fortreyt í okkara granskingar­umhvørvi við nógvum ymiskum virksemi og fakbólkum.

Løn sambært sáttmála millum Starvsfelagið og Fíggjarmálaráðið.

Umsókn

Umsókn við avritum at prógvum, CV og viðkomandi skjølum skal vera Havstovuni í hendi í seinasta lagi 9. november 2026 kl. 12.

Umsókn skal sendast í telduposti til Havstovuna frámerkt ”Starv” á starv@hav.fo.