Í vikuni varð nýggja 5-mannafarið hjá Árnafjarðar Róðrarfelag (ÁRF) flotað, og samstundis varð avdúkað, at navnið er “Katla”.
Árnafjarðar Róðrarfelag er í løtuni kappróðrarfelagið í Norðoyggjum við besta vindinum í seglunum.
Felagið hevur fyri stuttum latið byggja sera snotulig og felagshøli og neyst, og nú í vikuni varð triði kappróðrarbátur felagsins sýndur fram og flotaður fyri fyrstu ferð.
Ein nýggjur bátur skal sjálvandi hava eitt hóskandi navn, og www.arf.fo skrivar, at nýggja fimm-mannafarið hjá ÁRF fekk navn eftir eina navnakapping, har íalt á leið 80 uppskot komu inn.
Og tað komu trý uppskot inn um navnið "Katla".
Uppskotini komu frá:
Miriam Askham Olsen
Thurid í Buð
Julius Steffensen
Nýggja fimmmannafarið hjá Árnafjarðar Róðrarfelag skal eita :
Katla
Hetta hevur ein samd navnanevd valt, ímillum tey innkomnu uppskotini.
Tilsamans komu um 80 uppskot inn og harímillum var navnið Katla. Tað var eisini so løgið at 3 fólk høvdu skotið hetta navnið upp, so tað man hóska væl á mannamunni.
Í grundgevingunum siga tey sum sendu uppskot inn, millum annað :
– Orsøkin til at eg haldi at hetta navni er væl hóskandi, er at søguligi tingstaðurin í Køtlum liggur omanfyri Árnafjørð.
– Annars er Katla eisini eitt gamalt íslendskt gentunavn, sum eisini verður brúkt í Føroyum.
– Fær meg at hugsa um gamla tingstaðin "uppi í Køtlum" í Árnafirði. Eisini er ein fiskur ið eitur "Katla fish". Sum sigst at vera øgiliga vælsmakkandi, og við einum góðum kiloprísi 🙂 Leggjast kann afturat at Katla er eitt tað vandamiklasta gosfjallið í Íslandi. Katla er eisini drekin í kenda ævintýrinum "Brøðurnir Leyvuhjarta".
– Tí Árnafjørður var miðøki Norðoyinga fyri øldum síðani, har TING bleiv hildið, staðið nevnist á Køtlum, á Katlinum, og er KATLA eitt sera fitt og vakurt navn til bátin, og hevur eisini nakað við Árnafjørð at gera.
– Tá – fyri øldum síðani bleiv TING hildið í Árnafirði og sær tað ikki mætari út enn at Árnafjørður aftur er vorðið eitt savningarstað, við framburi, serliga í kappróðri, hvør veit um Árnafjørður ikki eisini verður savningarstað fyri kappróðurin í Norðuroyggjum.
Vit fara við hesum at ynskja tykkum góða eydnu við bátinum.
Símun M. Poulsen
Livar Nysted
Nikolas Olsen
Formaður í Árnafjarðar Róðrarfelag er Atli Steinbjørn Justinussen.
