Avskriva keyp av list

Í gjár tosaðu landsstýrismenn um møguleikan av at avskriva í samband við keyp av list. Hetta er nakað, sum er kent í londum rundan um okkum.

Á landsstýrisfundi í gjár, tosaðu landsstýrismenninir, ‘um at avskriva keyp av myndlist og stuðul til mentanarlig endamál.’ Tað var landsstýrismaðurin í mentamálum, Jógvan á Lakjuni, sum ynskti at fáa í lag kjak um hetta evnið.

– Eg legði hetta evnið fram á fundinum í gjár, við tí í hyggju at betra um møguleikarnar hjá listafólki at virka í Føroyum. Vit kenna tað frá londum rundan um okkum, ið hava skipanir, sum loyva privatum fyritøkum, at avskriva ein part peninginum, sum tær brúka til keyp av list.
– Enn er talan ikki um nakrar ítøkiligar ætlanir, men eg bað á fundinum um loyvi at tosa við Toll & Skatt, um hesi viðurskiftini.
– Landsstýrismenn vóru sum heild positivir stillaðir yvirfyri hesum málinum, sigur Jógvan á Lakjuni.

Landsstýrismaðurin leggur áherðslu á, at talan als ikki kann fara at verða um, at avtaka alla minka um stuðulin, sum verður veittur ígjøgnum Mentanargrunnin.