(Dystarfrásøgn) Føroyska liðið gjørdi alt tað var ment fyri at fáa sigurin og hevði bæði leikliga yvirvág og nokk av møguleikum, men inn vildi bólturin ikki.
Føroyska liðið spældi í 4-4-1-1 leikskipan, har Sonni Ragnar Nattestad og Hallur Hansson vóru aftur at síggja í uppstillingini, meðan Róaldur Jakobsen byrjaði sum hangandi álopsleikari.
Jóan Símun væl upplagdur
Fyrri hálvleikur snúði seg í stórum um ein leikara, Jóan Símun Edmundsson. Føroyski álopsleikarin var væl upplagdur og hevði fleiri góðar royndir á málið hjá Lettlandi. Føroyar høvdu gott tamarhald á dystinum, men tá nakað skuldi skapast, so lá tað mesta á Jóan Símuni fyri at fáa avgerandi støðurnar. Einu ferðina endaði skallari eftir innlegg frá Gilla R. Sørensen á stongini.
Trýstu fyri at fáa málið
Í seinna hálvleiki var leikgongdin tann sama. Føroyar sótu fyri tað mesta á dystinum, hóast ein sá, at tað vóru væl størri dygdir á liðnum hjá Lettlandi enn hjá t.d. Andorra. Tí kundu føroyingar heldur ikki vera passivir og gloyma verjupartin. Í seinna hálvleiki fingu føroyingar eisini nakrar stórar møguleikar. Jóan Símun skeyt aftur á stongina, meðan Gilli R. Sørensen skeyt viðsíðuna av.
Kundu neyvan gjørt meir
Hóast tað ikki eydnaðist at vinna, sum tað gjørdi á útivølli, so kunnu føroyingar vera væl nøgdir við sítt avrik. Stríðviljin kundi ikki verið betri, mótstøðuliðið slapp ikki til tað heilt stóra hóast onkran hampiligan møguleika og í álopspartinum skapti føroyingar nóg nógvar møguleikar til at fáa mál. Eisini var gleðiligt at síggja, at allir innskiftu leikararnir – René S. Joensen, Kaj Leo í Bartalsstovu og Patrik Johannesen – gjørdu mun. Tað sum ikki var gott nokk var, at tað ikki eydnaðist at skora uppá nakran av mál møguleikunum. Føroyar hava nú 9 stig í flottastu undankappingini í søguni hjá føroyska A-landsliðnum. Nú verður dystur um 3. plássið í Ungarn týskvøldið.
