Báta- og Listasavnið í Leirvík, sum varð sett á stovn í ár 2000, og sum hýsir týdningarmiklum parti av bátum, sjóvinnusøgu og listasøgu Leirvíkar, verður opið skírisdag, langafríggjadag og páskaaftan.
Hundrað-ára føðingardagin hjá Leirvíksmálaranum, Jóannis Kristiansen, hin 12.februar í ár, læt upp forkunnug serframsýning við einum hópi av málningum hansara á ovastu hædd í bygninginum, sum er gamla turkihúsið hjá Klæminti Eliasen og Elias Eliasen og sum seinni hýsti reiðaravirkseminum hjá Osmundi Justinussen og øðrum fram til 2012, tá Eysturkommuna tók yvir bygningin.
Framsýningin hongur uppi enn, og nú er aftur høvi at njóta verk eftir Jóannis Kristiansen (12/2 1918- 3/3 1988) – eins og eftir Sámal Toftanes og onnur listafólk úr Leirvík.
Vælútgjørda, áhugaverda og hugnaliga bátasavnið á miðhæddini er sjálvsagdur partur av vitjanini.
Skírisdag, langa fríggjadag og páskaaftan verður Báta-og Listasavnið opið frá klokkan 16 til 18, allar tríggjar dagarnar.
