Av tí at fleiri og fleiri fólk vitja ymisku stevnurnar við báti, hava fyrireikaranir mett, at sjálvsagt er at knýta eina bátastevnu at stevnuni, tí umstøðurnar í Runavíkar havn eru frálíkar.
Bátastevnan verður skipað í samstarvi við bátafelagið á staðnum og verður hildin í sjálvum bátahylinum, sum liggur sera tætt at stevnuøkinum. Ætlanin er, at bátarnir skulu koma til Runavíkar nakað áðrenn karnevalsgonguna fríggjakvøldið. Nógvur tónleikur verður á skránni á bátastevnuni, m.a. hava fyriskipararnir syrgt fyri at seta eitt stórt tjald upp á havnalagnum tætt upp at stevnuøkinum.
Um dagin verður góður harmoniko tónleikur og klaverspæl at hoyra – kryddrað við góðum felagssangi ímillum.
Fríggjakvøldið spælir Hallur Joensen saman við Wolfgang í Heiðateltinum. Leygarkvøldið er so møguleiki at fara á góðan bryggjudans. Sunnukvøldið verður EM finala í fótbóltið víst á stórskýggja í Heiðateltinum.
