Meðan búfólkini sótu í upphaldsstovuni og hugdu eftir “Degi og viku” í sjónvarpinum, fór ein stórur rútur í knús og glassplintur fuku um oyruni
Tá Norðlýsið vitjaði eldrasambýlið "Gøtubrá" í morgun var lagið gott á búfólkum og starvsfólkum.
Tey høvdu havt eitt dramatiskt kvøld – sum tó endaði væl – og nú fyrireikaðu tey døgurðan – Kjálkar – og tað er altíð ein succe.
Dramatiskt
Anna Jacobsen, deildarleiðari í eldrasambýlinum "Gøtubrá" í Norðragøtu, sigur at talan var um eina sera dramatiska hending.
– Búfólkini sótu saman við starvsfólkum og hugdu eftir Degi og Viku í uppihaldsstovuni – tá bráðliga ein av stóru rútunum í stovuni fór í smildur.
– Vanliga eru tvey starvsfólk til arbeiðis um kvøldi – men eitt av starvsfólkunum slapp ikki heim vegna veður og tí vóru tey trý fólk til arbeiðis.
– Tað fyrsta tey gjørdu var at fáa tey gomlu burtur frá knústa vindeyganum og síðani var roynt at seta upp fyri – og ringt var eftir sløkkiliðnum.
– Teir komu skjótt á staðið – men tá sløkkiliðstøðin eisini fór í vindinum høvdu teir ongar plátur at seta upp fyri.
– Men teir vóru ikki ráðleysir og ístaðin brúktu teir spísstovuborðini at seta upp fyri vindeyguni.
Steingrímur helt hurðini.
Áðrenn sløkkiliðið kom – og meðan starvsfólkini royndu at fáa tey gomlu út úr uppihaldsrúminum – var stórt trýst ígjøgnum húsini og nógv stóð á úthurðini.
78 ára gamli Steingrímur Ranghamar var einasta mannfólki í húsinum – sum hesa løtuna var førur fyri at gera nakað – og hann skundaði sær at fáa fatur á hurðini út í vindfangið, soleiðis at opið ikki gjørdist ígjøgnum húsið.
– Nógv stóð á hurðini sum Steingrímur helt, tí durðalistin er brotnaður og lásið sum Steingrímur helt í brotnaði eisini.
Noyddust at flyta niður undur
Anna Jacobsen, sum býr í Leirvík tók tvey mannfólk við sær heimanífrá og tá tey komu á sambýlið høvdu starvsfólkini fingið samla búfólkini sum búðu á ovaru hæddini.
– Vit avgjørdu at flyta niður undur – men tá streymurin kom og fór kundu vit ikki brúka lyftina.
– Fýra av búfólkunum sita í rullistóli og tí máttu tey berast niður gjøgnum trappurnar.
– Vit ummøbileraðu so rúmini, sum venda niðan eftir og reiddu ból á gólvinum.
Endaði gott
Anna sigur at tá tey høvdu fingið savnað tey gomul í einum rúmi niðri í kjallaranum fóru tey at hugna um – og borðreitt var við drekka og køkum.
– Hetta bleiv ein hugnaligur endi og tá farið var til songar sovnaðu øll rættuliga skjótt.
– Í morgun hevur tryggingin og Kommunan kannað bygningin sum hevur fingið skaða ymsastaðir.
– M.a. eru smærri skaðar sum undandáttin loft – men eisini hevur betongveggurin í uppihaldsstovuni fingið skaða.
– Glassplintur eru allastaðir – so tað verður ein løta áðrenn alt verður í rættlag aftur.
