Næmingarnir eru ikki nógvir, men teir trívast, tað ger tað heldur ikki verri, at lærarinnan er úr Mikladali eisini, nevniliga 25 ára gamla Maria Sørensen, sum fekk læraraprogv í summar.
Fríggjadagin síðstu viku, vitjaði Norðlýsið í Mikladali, og tá fingu vit eitt lítið prát við lærarinnuna Mariu Sørensen.
Maria segði okkum, at næmingarnir fáa fýra dagar um vikuna undirvísing í lítla og hugnaliga skúlanum í Mikladali. 5. Dagin eru næmingarnir í Mikladali í Klaksvík, á Skúlanum á Ziskatrøð, tað sýnast tær at trívast væl við, sigur Maria Sørensen, vit plaga at lagað tað so, at fimleikur og ítróttur er á skránni tá vit eru í Klaksvík, og tað dámar teimum sera væl.
Skúlin her hoyrir undir Skúlan á Ziskatrøð, og tá eg fekk starv á hesum skúlanum eftir summarfrítíðina, bleiv eg spurd, um eg hevði hug at undirvísa í Mikladali. Tað tímdi eg væl, tí eg eri ættað higani og búgvi her og í Klaksvík.
Eg kendi sjálvandi væl skúlan í Mikladali og eisini arbeiddi eg her sum vikar eitt skiftið ímeðan eg gekk á læraraskúla. Heðin Klein og Elisa Waag hava skiftst um at undirvíst her undan mær, og tá annað teirra fór frá vegna aldur í november í fjør og hin eftir summarfrítíðina, so var arbeiðið sum lærari leyst her.
Næmingarnir, sum ganga í skúlanum her nú, eru bert tríggir, ein genta av Trøllanesi, sum gongur í 5 . flokki og ein úr Mikladali og ein av Trøllanesi, sum ganga í sjeynda flokki.
Gentirnar, ið ganga í sjeynda eru Rannvá Eyðunsdóttir og Bjørg í Norðnastovu, gentan í 5. Flokki er Andrea Eyðunsdóttir. Tær eldru genturnar skulu sostatt í 8. Flokk komandi ár, og tað hevur við sær, at fara til Klaksvíkar at ganga í skúla. So verður bert ein næmingur eftir í skúlanum í Mikladali.
Tá vit spyrja Andreu, Rannvú og Bjørg, hvat tær fáa undirvísing í, nú tær hava hundar inni í skúlastovuni tá vit vitja, siga tær, at tær millum annað hava havt lívfrøði ídag, og at tær í hesum sambandi hava lisið úr eini bók um hundar í avlopstíðini. Fyri at gera tað stuttligari, hava vit tikið hesar fittu hvølparnar inn í skúlastovuna.
Okkum dámar sera væl at ganga í skúla her, siga tær við ein munn, tá vit spyrja og tá vit spyrja um dagin í Klaksvík, siga tær tað sama, tað er stuttligt at koma í skúla í Klaksvík ein dag um vikuna.
Maria Sørensen, lærarinnan er ógift, men hon hevur ein unnusta, og hann er sjómaður, Maria sigur, at tey eru í ferð við at setast í búgv í Klaksvík.
