Í eina tíð nú er 18 ára gamla Elinborg Pálsdóttir veruliga farin at gera um seg á føroyska tónleikapallinum. Hetta verður í dag, fríggjadagin 21. august, markerað við fyrstu EP útgávuni, ið ber heitið “Spor.” Somuleiðis verður høvi at hoyra Elinborg framføra løg av nýggju fløguni í TUTL handlinum á Káta Hornið kl. 16, har útgávan fæst til keyps.
Løgini hevur Høgni Lisberg framleitt, Jens L. Thomsen miksað og Jan Eliasson mastrað. Saman við Elinborg spæla Benjamin Petersen og Mikael Blak eisini á útgávuni. Húsan hevur Petur Hansen gjørt.
Talan er um løg í singer/songwriter stílinum og eina persónliga fløgu, ið nemur við slík evni sum longsil, kærleika og at missa. Elinborg hevur sjálv gjørt bæði løg og tekstir, sum allir eru á føroyskum.
Fyrsta staklagið “Dreymur” kom út herfyri, og næsta staklagið ”Tanki” verður nú sent í umfar. Til ber at hoyra brot av øllum løgunum á TUTL heimasíðuni.
