Út frá støðuni á stigatalvuni, nú bert 2 umfør resta, er at heiðursmerkjabýtið er eitt mál millum HB, B36 og B68, meðan niðurflytingin er ein spurningur millum Skála, FSV og VB. Liðini harímillum, sum bara hava æruna eftir at spæla fyri, eru NSÍ, KÍ, EB/Streymur og GÍ.
Stitatalvan í 1. deild sær í løtuni soleiðis út:
Nr. Lið Dystir V – J – T +mál -mál munur Stig
1. HB 16 10 – 5 – 1 36 15 21 35
2. B36 16 11 – 1 – 4 34 17 17 34
3. B68 16 9 – 5 – 2 23 12 11 32
4. NSÍ 16 8 – 4 – 4 29 16 13 28
5. KÍ 16 7 – 2 – 7 25 25 0 23
6. EB/Str. 16 5 – 6 – 5 29 33 -4 21
7. GÍ 16 5 – 5 – 6 23 26 -3 20
8. VB 16 3 – 4 – 9 15 28 -13 13
9. FSV 16 3 – 2 -11 22 39 -17 11
10. Skála 16 2 – 0 -14 9 34 -25 6
Fremsti biðilin til føroyameistaraheitið tykist at vera HB, men bæði B36 og B68 kunnu taka gullið framman fyri nøsini á eldra høvuðsstaðarfelagnum HB, sum tangerar metið hjá KÍ í vunnum føroyameistaraheitum, um teir vinna FM í ár.
Í botninum tykist støðan hjá Skála heldur ómøgulig. Eftir at KÍ ikki megnaði at forða FSV í at vinna trý stig sunnudagin, má Skála um teir skulu av aftasta plássi – vinna á FSV á útivølli og á EB/Streymi á heimavølli, samstundis sum FSV má tapa teirra seinasta dyst ímóti NSÍ í Runavík.
Um hetta hendir, fer Skála fram um FSV og upp á næst aftasta pláss, sum gevur teimum ein niðurflytingardyst ímóti næst ovasta liðnum í 2. deild.
Um FSV hinvegin vinnur á Skála nú sunnudagin, og VB tapir teirra útidyst ímóti EB/Streymi, so flytir Skála beinleiðis niður í 2. deild, og VB er tá í vanda fyri at skula spæla um niðurflyting, tí tá liggja teir næstniðast áðrenn seinasta umfar.
