Eftir eina góða byrjan upp á kappingina við sigrum í báðum teimum fyrstu dystunum, hevur eydnan ikki verið Mjølnirkvinnum eins blíð í 3. og 4. umfari.
Næstan í eitt mannaminni var besta kvinnuliðið hjá Mjølni oddalið á hvørjum ári, har liðið ongantíð endaði lægri enn nr. 2 og ofta var føroyameistari.
Fyri nøkrum árum síðan kom so eitt ættarliðsskifti í felagnum, sum gjørdi, at liðið nú í eina tíð hevur ligið í lægra endanum av stigatalvuni.
Men nú er eitt og annað, sum bendir á, at Mjølnir-kvinnur eru á veg uppaftur. Í øllum førum eru úrslitini byrjað at batna.
Í fyrsta dystinum í EIK-liguni vunnu Mjølnir-kvinnur heimadystin ímóti ÍF, og í næsta dystinum vunnu tær aftur, ta ferðina á KÍF á útivølli.
Men nú er aftur stígur komin í sigursrøðina.
Fyrst taptu tær á heimvølli fyri SÍ, og nú um vikuskiftið varð aftur galið.
Besta kvinnulið Mjølnirs var um vikuskiftið á Giljanesi og spældi ímóti Drátti, og hóast munurin í hvørjum einstøkum setti var rættiliga avmarkaður, so vunnu Mjølnirkvinnur tó einki sett, og dysturin endaði tí 3-0 til Drátt.
Úrslitini í hvørjum einstøkum setti vóru: 25-18, 25-21 og 25-23
Við hesum er støðan í EIK-liguni hjá kvinnum henda:
1) SÍ 4 dystir 8 stig
2) Dráttur 5 dystir 8 stig
3) Fleyr 4 dystir 6 stig
4) Mjølnir 4 dystir 4 stig
5) ÍF 4 dystir 4 stig
6) KÍF 6 dysti 2 stig
7) TB 5 dystir 0 stig
Sostatt er Mjølnir framvegis væl við í kappingini í EIK-liguni.
