Tað var “same procedure as every year” í FM í snartalvi leygardagin, tí Helgi Dam Ziska vann 5. árið á rað.
Nummar tvey gjørdist Olaf Berg, sum síðan Klaksvík International kappingina, sum var fyrr í heyst, tykist hava fingið sera góðan talv-vind í seglini – eitt nú vann Olaf bæði síni talv ímóti FM-vinnaranum Helga, men úrtøkan ímóti hinum luttakarunum rakk kortini ikki til at basa Helga í endastøðuni á stigatalvuni.
Finnbjørn Vang
flott triðjapláss
Nummar trý gjørdist okkara egni lokali og framúr góði snartelvari, Finnbjørn Vang, sum hevur vunnið manga snartalvkappingina, men hesaferð mátti hann tó taka til takkar við bronsuni, sum eisini var sera, sera flott, havandi í huga “kongarøðina” av føroyameistarum, sum luttóku í kappingini í ár.
Fleiri av okkara stinnastu snartelvarum luttóku í orrustuni í ár, eitt nú John Rødgaard, Martin Poulsen, Eyðun Nolsøe, Carl Eli Nolsøe Samuelsen og Torkil Nielsen – umframt Olaf Berg og Finnbjørn Vang.
– – –
Tað vóru í alt 35 telvarar, sum sessaðust við talvborðini í Havnar Telvingarfelag, tá FM í Snartelving varð telvað seinnapartin leygardagin.
Telvað vórðu 9 dupultumfør – ella samanlagt 18 talv. Umhugsunartíðin er bert 5 minuttir í part til talvið í snartelving og hetta innibar til tíðir sera undirhaldandi snartelving har ferðin var øgilig.
Undan FM-kappingini, vóru 3 telvarar, sum áður hava vunnið FM heitið 4 ferðir, síðani kappingin byrjaði í 1980.
Spenningur var sostatt um, hvørt Helgi Dam Ziska fór at megna at taka metið, og tað var júst tað, hann gjørdi, hesin framúr sterki telvarin, sum eisini er úr sannari telvaraætt.
Helgi vann FM heitið hesaferð við 15½ stigi, av 18 møguligum. Sostatt misti hann bara eitt hálvt stig aftur at teimum báðum stigunum, sum hann misti ímóti Olafi Berg.
Sostatt skrivaði Helgi seg í søgubøkurnar sum mest vinnandi snartelvarin nakrantíð. Leggjast kann afturat, at tað er heilt einastandandi at hava vunnið FM heitið 5 reisur uppí slag. Enn eitt met sum verður sera sera trupult at knógva.
Men sum nevnt slapp Helgi slapp ikki snikkaleysur í kappingini, tí Olaf Berg, sum endaði bara 1½ stig aftan fyri Helga í endaligu støðuni við 14 stigum, gav Helga av álvara ein skarpan gang við at tinna 2-0 á Helga.
Nakað óvæntað úrslit teirra millum, men sum sagt hevur Olaf í seinastuni víst sera góðar taktir, og øll, sum fylgja við í føroyskari telving, vita, hvussu evnaríkur Olaf er. Bæði evnaríkur og ungur, so har er eisini nógv gott í væntu.
Úrtøkan hjá Finnbjørn Vang á triðjaplássi gjørdist 12½ stig.
Einar Gregersen
3. ratingvirðisløn
Í slíkum kappingum er eisini altíð spenningur um, hvør av telvarunum klárar seg best í mun til sítt egna styrkital.
Ta kappingina vunnu hesaferð Rógvi Egilstoft Nielsen (1 ratingvirðisløn), Heiðrikur Tindskarð Jacobsen (2 ratingvirðisløn) og Einar Gregersen (3 ratingvirðisløn).
FM í Snartalv 2008 – endastøðan:
1 Ziska, Helgi D. 2409 15.5 stig
2 Berg, Olaf 2191 14.0 stig
3 Vang, Finnbjørn 2072 12.5 stig
4 Nolsøe, Eyðun 2177 12.0 stig
5-6 Rødgaard, John 2354 11.5 stig
Nielsen, Rógvi E. 1913 11.5 stig
7-8 Poulsen, Martin 2261 11.0 stig
Samuelsen, Carl E. N. 2268 11.0 stig
9-11 Justinussen, Sigurð 1810 10.5 stig
Nielsen, Torkil 2029 10.5 stig
Jógvansson, Hjalt T. 1822 10.5 stig
12 Jacobsen, Heiðrikur 1625 10.0 stig
13-15 Johansen, Haldur S. 1970 9.5 stig
Joensen, Jógvan 1850 9.5 stig
Gregersen, Einar 1235 9.5 stig
16-21 Hansen, Herluf 2045 9.0 stig
Nielsen, Høgni E. 1653 9.0 stig
Mikkelsen, Jón 1714 9.0 stig
Jacobsen, Súni 1836 9.0 stig
Dam, Vagnur 1499 9.0 stig
Thomsen, Jónfinn 1800 9.0 stig
22-23 Thomsen, Bernhard 1898 8.5 stig
Gregersen, Heðin 1345 8.5 stig
24-25 Berg, Margar 1625 8.0 stig
Olsen, Alfred 1056 8.0 stig
26-27 Stórá, Borgar J. 179 7.5 stig
Joensen M., Jón 1129 7.5 stig
28-32 Andreasen, Jón 1622 7.0 stig
Lon í, Ronny 1546 7.0 stig
Johannesen, Bergur 1366 7.0 stig
Mortensen, Jóhan R. 1149 7.0 stig
Hentze, Jóhan 1164 7.0 stig
33-35 Gregersen, Julian 1000 6.0 stig
Jacobsen, Rúni T. 1047 6.0 stig
Olsen, Sjúrður 1038 6.0 stig
