Ætlanin hjá KÍ-spælarunum, tá ið teir fóru út á Toftir sunnudagin, var at vinna dystin og harvið at koma upp úr botninum í Formuladeildini, men tað eydnaðist ikki, og tí er KÍ bert 1 stig frá botninum.
Nú 6 umfør eru spæld í Formuladeildini í ár, liggur KÍ framvegis stutt upp frá botninum.
Ikki tí – gongdin teir seinastu tríggjar dystirnar hevur verið munandi betri enn í teimum trimum fyrstu, sum liðið tapti allar.
Fyrst var KÍ fyri ósigri ímóti EB/Streymi úti 0-4, síðan tapti liðið 1-2 heima móti HB, og triðja dystin tapti KÍ eisini 1-2, ta ferðina á útivølli móti Skála.
Harvið var úrtøkan 0 stig eftir 3 tey fyrstu umførini, og støðan var alt annað enn góð.
Síðan hava úrslitini verið betri, hóast KÍ enn bert hevur vunnið eittans sigur.
Fjórða úrslitið hjá KÍ í Formula var ein harðvunnin 2-2 javnleikur í Fuglafirði móti væl leikandi ÍF-arum, síðan vann KÍ 2-1 á B71 við Djúpumýru, og nú bleiv tað so til enn ein javnleik, 1-1 á Toftum móti B68.
Sostatt er gongdin ein onnur og meira jalig í løtuni.
Hinvegin hevur laka úrtøkan í teimum fyrstu dystunum gjørt, at KÍ framvegis er at rokna sum eitt botnlið í Formuladeildini.
Í øllum førum er enn stutt niður á botnin, nú 6 dystir eru leiktir.
Í skrivandi løtu er støðan í Formuladeildini henda:
01) HB 5 dystir 11 stig
02) EB/S 5 dystir 11 stig
03) NSÍ 5 dystir 10 stig
04) B36 6 dystir 10 stig
05) ÍF 6 dystir 10 stig
06) Vík. 5 dystir 6 stig
07) KÍ 6 dystir 5 stig
08) B68 6 dystir 5 stig
09) B71 6 dystir 4 stig
10) Ská. 6 dystir 4 stig
