Statistikkurin, Stemningurin, Stórsligna landslagið og Søguligu avrikini gera Svangaskarð til Skansa okkara nummar eitt, sum vísti seg at vera rætti karmurin um enn eitt søguligt landsliðsavrik – ein djørv og røtt avgerð av Brian Kerr – THANK YOU, BRIAN.
Tað var her, vit Hans Fróði Hansen javnaði til 1-1 ímóti skotum upp á hornasparkið frá John Ryan, tað var her John Petersen skoraði tey heimsgitnu tvey málini eftir uppspæl frá Jákupi á Borg, tað var her Todi Jónsson rann frá russisku verjuni og legði Føroyar framum 2-1, tað var her Todi javnaði til 2-2 ímóti Spania, tað var her Øssur Hansen javnaði til 2-2 ímóti Slovenia … alt hetta hendi her á Svangaskarði, og vit kundu hildið fram.
Og mín sann um ikki Svangaskarð aftur í 2009 – eftir at hava verið gloymt og goymt burtur í eina tíð – enn einaferð hevur prógvað, at tað ER okkara besti og rætti heimavøllur, tí í kvøld, mikukvøldið 9. í 9. í 9, hava Føroyar á Svangaskarði vunnið 2-1 á Litava.
Hetta er ein søguligur sigur, tí sum skilst er hetta fyrsti sigur hjá føroyska landsliðnum á einum landsliði, sum er í hægri styrkisbólki enn vit, síðan søguliga 1-0 sigurin á Eysturríki í Landskrona á sinni – sanniliga ein søguligur sigur.
Jú, hetta var ein dagur, har Brian Kerr tók nógvar djarvar, klókar og hepnar avgerðir – millum annað var tað hansara avgerð, at vit skuldu spæla hendan dystin á Svangaskarði – genialt, má sigast!
Millum aðrar djarvar avgerðir var eisini tann at brúka Bartal Eliasen í miðverjuni, har hann vísti seg at vera framúr saman við stóra Atla Gregersen til at verja føroyska luftrúmið í verjuni – fantastiskt!
Og so mugu vit ikki gloyma málskjúttarnar. Eitt flott fríspark, vunnið av Holst, sum Súni Olsen sendi í netið við einum fantastiskum frískparki, og 2-1 málið av Arnbjørn Hansen, sum Kerr eisini hevur kallað innaftur í landsliðshitan.
Ein onnur søgulig hending í hesum dysti var tann, at hetta – sum skilst – er seinasti heimadystur fyri landsliðið hjá Jákup Mikkelsen, landsliðsmálverja, sum aftur hesaferð stóð ein branddyst í málinum. Ein virðiligur avslutningur hjá Jákupi á heimavølli. Eitt serligt tillukku til tín, Jákup, og ein hjartans tøkk.
– – –
Tað er nakað serligt við Svangaskarði. Flestu stadion liggja mitt í býunum, eisini Tórsvøllur, og tí er Svangaskarð nakað heilt serligt at uppliva – eisini hjá gestunum, sum spæla ímóti Føroyum, sum næstan altíð minnast til "the fantastic scenery" (tað fantastiska landslagið og útsýnið) á Svangaskarði, sum uttan iva fær vitjandi leikararnar veruliga at kenna seg á fremmandari "fjalla"grund – hetta er heilt vist ein fyrimunur fyri føroyska liðið.
Eisini er meira áskoðaradámur á Svangaskarði – ein dámur ella stemningur, sum kann gerast enn betur, um nakrar milliónir verða brúktar upp á gera nøkur áskoðaratøk og veggir, sum bæði høvdu vart fyri regni og vindi OG ikki minst skapt meira gang og dám inn á vøllin til leikararnar.
Jú … Svangaskarð er skansi okkara nr. eitt – tað var sjón fyri søgn enn einaferð í 2-1 sigrinum á Litava tann níggjunda í níggjunda í níggju.
TILLUKKU FØROYAR
TILLUKKU BRIAN KERR
TILLUKKU SVANGASKARÐ
