Leygardagin byrjaði SISU sparkivallakappingin hvørs endamál er at skapa ein positivan anda millum FSF, feløg, bygdir, foreldur og børn
Samstundis var sparkivøllurin á Húsum alment handaður Húsa Kommunu og í hesum sambandi helt Rúni Heinesen eina røðu.
Borgarstjórin í Húsa kommunu, Súsanna Høgnesen, frøddist um nýggja vøllin og síðani var tað sjálvur KÍ-veteranurin, Harley Bertholdsen, sum fekk heiðurin at skjóta fyrsta málið á nýggja vøllinum.
Um SISU fótbóltskappingina
Leygardagin byrjaði eisini SISU sparkivallakappingin sum nú fer at ferðast kring smáu sparkivøllirnar sum eru bygdir ymsastaðni í landinum og í hesum sambandi hevur Føroya Bjór gjørt eina nýggja heimasíðu www.sisu.fo har fylgjast kann við hvussu gongur við kappingini.
Endamálið við kappingini er: At skapa ein positivan anda millum FSF – felagið – bygdina – foreldrini – børnini o.s.fr.
At hava eitt tiltak, har sjálvt fótbóltsspælið, og gleðin við at luttaka í hesum, eru í miðdeplinum.
At vísa at fótbóltsspælið kann leikast á øllum plássum í landinum.
Allar kappingarnar verða skipaðar sum einkult tiltøk. Aldursbólkurin er gentur og dreingir fødd í 1999-2000. Talið á luttakandi liðum er avmarkað til 8 lið. Liðini kunnu verða mannaði av bæði gentum og dreingjum.
Reglur, mannagongdir v.m.: Hvør dystur er 5 minuttir. Í minsta lagi 1 vaksin leiðari (foreldur e.l.) skal verða við hvørjum liði til kappingina. Hvørt lið hevur 4 leikarar og kann hava 1 eykaleikara. Aftasti leikari kann taka bóltin við hondunum (kann verða málmaður). Luttakarnir fáa T-shirt og SISU-vatndunkar. Føroya Bjór letur T-Shirt og SISU-vatndunkar til allar luttakararnar.
