1. deildarliðið hjá KÍ vann leygardagin ein tryggan 3-1 sigur á B36 í Gundadali, og birti harvið aftur vónina um at sleppa undan niðurflyting.
Lagið var framúr gott í KÍ hópinum, tá teir seinnapartin leygardagin høvdu greitt ein bundnan arbeiðssetning, sum var at vinna á botnliðnum B36.
KÍ liggur enn til niðurflyting, og hvør dystur er tí ein bardagi fyri lívinum.
SÍ, sum liggur triðniðast, tapti leygardagin, og harvið er bert eitt stig á muni millum SÍ og KÍ, so nú er veruligur spenningur komin í.
Um dystin hjá KÍ ímóti B36 kann í stuttum sigast, at Otto Jacobsen legði KÍ á odda í fyrra hálvleiki og stutt eftir hálvleik javnaði B36.
John Hammer legði síðan KÍ framum 2-1, og so slóg Jákup Hansen sigurin fastan við einum máli til 3-1.
Koyr á KÍ !!
