Árið í fjør hjá Vodafone var merkt av, at kundar fingu fyrimunir av bíligari og betri telesamskifti. Prísirnir lækkaðu sum heild, og við 4G á fartelefonini fingu Vodafone kundar – sum teir fyrstu í Føroyum – munandi betri og skjótari internet.
Tíðindaskriv – Vodafone:
Árið í fjør hjá Vodafone var merkt av, at kundar fingu fyrimunir av bíligari og betri telesamskifti. Prísirnir lækkaðu sum heild, og við 4G á fartelefonini fingu Vodafone kundar – sum teir fyrstu í Føroyum – munandi betri og skjótari internet.
Príslækkingarnar vóru víðfevndar og síggjast aftur í roknskapinum fyri 2015, men kortini er úrslitið gott – hitt næstbesta hjá Vodafone higartil.
Úrslitið vísir eitt avlop á 8,4 mió. kr., sum er 2,3 mió. kr. minni enn í 2014.
Seinnu árini hava úrslitini verið á góðari leið. Góð úrslit koma ikki av sær sjálvum – tey eru okkara dugnaligu starvsfólkum fyri at takka, sigur Gudny Langgaard, stjóri í Vodafone.
Kappingin á fjarskiftismarknaðinum – herundir príslækkingar fyri reiking í útlandinum og internet á fartelefonini – ávirkaðu eisini umsetning og úrslit. Eitt nú fór Vodafone í fjør at bjóða fría talu og bíligari data í Norðurlondum og Europa, og datapakkar í Føroyum gjørdust eisini munandi bíligari.
Vodafone heldur áfram við at menna føroyska fjarskiftismarknaðin og tryggja kapping við at gera stórar íløgur í menning av 3G og 4G netinum til fartelefonir, sum heldur áfram í 2016.
FAKTA UM VODAFONE:
Navn: Vodafone (Kall pf.)
Tænastuøki: Heildarveitari innan breiðband, fastnet og fartelefoni
Stovnað: 1999
Byrjað tænastur: 2001
Yvirskot fyrstu ferð: 2004
Eginogn: 45,2 mió.kr.
Javni: 63,8 mió.kr.
Solvensur: 70,9 %
Langfreistað skuld: 0,0 mió.kr.
Starvsfólkatal: 33
Stjóri: Gudny Langgaard
