Ikki var tað vakurt, men KÍ vann at enda 2-1 í einum jøvnum dysti, har innskifti Heðin Klakstein bjargaði klaksvíkingum øll trý stigini.
Sum heild var talan um ein javnan og spennandi dyst millum KÍ og AB. AB liggur eftir hendan dystin á 9. plássi, men øll sum sóu dystin kunnu siga, at tað verður neyvan AB, ið flytur niður, sum liðið avrikar í løtuni, tí lítil og eingin munur var á liðunum í dag.
KÍ skapti kanska teir størstu møguleikarnar í dystinum, men AB var væl við allan vegin og ofta manglaði bara tað seinasta hjá útiliðnum. Í hálvleikinum var KÍ á odda 1-0, men stutt inn í seinna hálvleik javnaði AB við brotssparki. Innskifti Heðin Klakstein vísti annað vikuskiftið á rað málform og sannførandi spæl og tað var hann, ið avgjørdi dagsins spennandi dyst. Hjalgrím Elttør, sum tykist stríðast sum ongantíð fyrr í løtuni, legði inn fyri úr vinstru og so gjørdi Heðin arbeiði liðugt við framúr vøkrum skoti. 2-1 var endaliga úrslitið og tað vóru klaksvíkingar sera væl nøgdir við, tí nú er KÍ partur av stríðnum um ovaru plássini, meðan AB nú er undir niðurflytingarstrikuni.
