Á fundi við uttanlandsnevndina hjá Løgtinginum, greiddi landstýrismaðurin í fiskimálum frá, at landstýrið ætlaði at gera býtishandil við íslendingar. Ætlanin er at geva íslendingum størri part av hækkand uppisjóvarkvotunum hjá Føroyum afturfyri at Føroyingar sleppa at fiskað meira av botnfiskið í Íslandi.
Á fundi við uttanlandsnevndina hjá Løgtinginum, greiddi landstýrismaðurin í fiskimálum frá, at landstýrið ætlaði at gera býtishandil við íslendingar. Ætlanin er at geva íslendingum størri part av hækkand uppisjóvarkvotunum hjá Føroyum afturfyri at Føroyingar sleppa at fiskað meira av botnfiskið í Íslandi.
Eisini ætlar landsstýrið at fáa javnvág í avtalurnar landanna millum, har ísland seinastu árini hevur fingið munandi meira burtur úr fiskivinnuavtalunum, enn føroyingar hava fingið.
—-
Tíðindaskriv frá Fiskimálaráðnum:
Føroyar og Noreg hava gjørt avtalu um fiskirættindi fyri 2017
Føroyar og Noreg hava í dag skrivað undir avtalu um sínámillum fiskirættindi fyri 2017 eftir samráðingar í Oslo tann 15. og 16. desember. Føroyska toskakvotan í norskum sjógvi hækkar nakað, og norska makrelkvotan í føroyskum sjógvi hækkar somuleiðis. Avtalan er á líknandi støði sum í fjør viðvíkjandi býti av kvotum, og atgongdin er eisini á líknandi støði.
Føroysk skip hava komandi ár loyvi at fiska 4.410 tons av toski, 1.025 tons av hýsu, 500 tons av upsa og 200 tons av øðrum fiskasløgum í norskum sjógvi. Harumframt fáa føroysk skip atgongd at fiska 4.000 tons av toski og 350 tons av hýsu, sum eru fingin til vega í sínámillum avtaluni millum Russland og Føroyar, í norskum sjógvi.
Norsk skip fáa í 2017 loyvi at fiska 2.000 tons av longu og blálongu, 1.700 tons av brosmu, 567 tons av upsa og 800 tons av øðrum fiskasløgum í føroyskum sjógvi. Eisini fáa norsk skip eina kvotu av makreli í føroyskum sjógvi uppá 4.979 tons. Hendan kvotan kann eisini veiðast í norskum ella altjóða sjógvi. Harumframt fáa norsk skip atgongd at fiska 34.800 tons av svartkjafti í føroyskum sjógvi í 2017.
Ein onnur broyting í avtaluni er, at teksturin viðvíkjandi Svalbard er broyttur, soleiðis at rættindi Føroya við Svalbard í framtíðini ikki fara at standa beinleiðis í sínámillum semjuni millum Føroyar og Noreg. Semja var millum partarnar um hetta. Føroyska toskakvotan við Svalbard í 2017 verður 1.814 tons og 437 tons av øðrum fiskasløgum, og tað er eitt vet lægri enn í fjør, samsvarandi heildarkvotuni.
Tað vóru Ingrid Vikanes, samráðingarleiðari hjá Noregi, og Andras Kristiansen, samráðingarleiðari hjá Føroyum, sum skrivaðu undir semju um sínámillum fiskiveiðirættindi fyri 2017 fríggjadagin 16. desember í Oslo.
Føroyar og Grønland hava víðkað avtaluna um fiskiveiðirættindi fyri 2017
Føroyar og Grønland hava í dag skrivað undir avtalu í Keypmannahavn um sínámillum fiskiveiðirættindi fyri 2017. Fiskiveiðiavtalan millum Føroyar og Grønland er lítil í vavi, men aftur í ár hækkar javnvágin í avtaluni.
Broytingarnar í 2017 vera, at føroysk skip fáa størri kvotur av toski og svartkalva í grønlendskum sjógvi, meðan grønlendsk skip fáa betri møguleika at veiða svartkjaft í føroyskum sjógvi. Hetta fer at koma skipum, ið vanliga fiska botnfisk við Føroyar, til góðar.
Føroyskum skipum verður loyvt at fiska tilsamans 1.225 tons av toski við Eysturgrønland og 475 tons av brosmu. Talan er um eina øking á 400 tons av toski. Harumframt økist kvotan av svartkalva við 50 tonsum upp í 325 tons. Føroyar varðveita eina royndarkvotu eftir krabba við Eysturgrønland á 500 tons.
Føroyska svartkalvakvotan við Vesturgrønland verður verandi 100 tons eins og í 2016.
Grønlendska kvotan av svartkjafti í føroyskum sjógvi økist við 5.000 tonsum upp í 13.000 tons. Grønland fær harumframt atgongd at fiska ta kvotu av svartkjafti, sum Grønland fær tillutað ígjøgnum NEAFC, í føroyskum sjógvi. Hetta eru góð 7.000 tons. Grønlendskum skipum verður harumframt loyvt at fiska 2.500 tons av norðhavssild, og tað er óbroytt í mun til 2016.
Ætlanin undan samráðingunum var eins og í fjør at økja føroysku toskakvotuna undir Grønlandi, og tað hevur eydnast við at lata Grønlandi størri kvotu av svartkjafti í føroyskum sjógvi.
Tað vóru grønlendski samráðingarleiðarin, Emanuel Rosing, og føroyski samráðingarleiðarin, Andras Kristiansen, sum skrivaðu undir sínámillum avtalu um fiskiveiðirættindi fyri 2017. Samráðingarnar fóru fram á Norðuratlantsbryggjuni í Keypmannahavn.
Føroyar og ES gjørt avtalu um fiskiveiðirættindi fyri 2017
Føroyar og ES skrivaðu tann 7. desember undir avtalu um sínámillum fiskiveiðirættindi fyri 2017. Avtalan er ikki nógv broytt í mun til avtaluna í fjør, men nakrar broytingar eru framdar.
Sínámillum atgongdin at fiska makrel í økinum hvør hjá øðrum er økt upp í góð 38.000 tons í samsvari við lutfalsligu hækkingina av heildarkvotuni av makreli. Føroyar varðveita samstundis somu atgongd og kvotu av svartkjafti, soleiðis at føroysk skip komandi ár hava møguleika at fiska góð 30.000 tons av svartkjafti í ES sjógvi. Atgongdin at fiska norðhavssild í sjóøkinum hjá hvørjum øðrum verður óbroytt, soleiðis at partarnir kunnu fiska 6.000 tons av norðhavssild hjá hvørjum øðrum.
Viðvíkjandi øðrum fiskasløgum so hækkar kvotan av hvítingsbróðri upp í góð 9.000 tons, meðan kvotan av brislingi lækkar niður í 1.000 tons, av tí at ICES mælir til eina munandi lægri veiðu í ár og næsta ár. Føroyska kvotan av sild í Skagerak verður 400 tons komandi ár, og føroysk skip kunnu veiða 200 tons av sild í ICES øki 4a í Norðsjónum.
Viðvíkjandi kvotum hjá ES í føroyskum øki verða kvoturnar av upsa, blálongu og kongafiski lækkaðar nakað í 2017, meðan aðrar kvotur av toski, hýsu, flatfiski og øðrum fiskasløgum verða óbroyttar.
Avtalað varð, at fiskiveiðieftirlitini hjá báðum pørtum framhaldandi skulu samstarva um at menna skipanir í samband við elektroniskar fráboðanir av veiðu.
