Eins og pisshúsið skal Ídni setast í nýtiligan stand. Tað halda meirilutar í bæði Havna- og vinnunnevnd og fíggjarnevnd Klaksvíkar býráðs. Í kvøld kemur málið fyri á býráðsfundi
Býráðsfundur er í dag kl. 17.30 og har skulu býráðslimir millum annað taka støðu til hvat bygningurin Ídni skal brúkast til.
Umsitingin í Klaksvíkar kommunu vil hava býráðslimir at taka støðu til um Ídni skal bjóðast út í samband við hugskotskoskapping ella loyva Kl. Havn at brúka bygningin til goymslu/smiðju.
Umsitingin skrivar:
Í fleiri ár hevur einki virksemi verið í bygninginum Ídni. Í eini roynd at fáa virksemi í bygningin aftur, samtykti býráðið fyrr í ár at bjóða bygningin út til eina hugskotskapping. Ein annar møguleiki er, at Ídni verður brúkt sum goymsla og smiðja hjá Klaksvíkar Havn. Hetta hevði verið hóskandi, nú arbeitt verður við møguleikanum at fáa gomlu Havnaskrivstovuna sett í stand og tikna í brúk aftur. Bygningurin kann setast í nýtiligan stand fyri ein mettan kostnað á 800.000–900.000 kr., eisini við varðveittari upprunaútsjónd.
Meirilutar í bæði Havna- og vinnunevnd og fíggjarnevnd Klaksvíkar býráðs taka undir við at Klaksvíkar Havn kann brúka Ídni til goymslubygning.
