Jan Elmar bleiv føroyameistari í hálvmaraton

Jan Elmar Sørensen úr Treysti, bleiv á heimavølli, føroyameistari í hálvmaraton, tá Treysti seinasta leygardag skipaði NS hálvmaraton á bilfríu vegunum í Klaksvík.

Hann var frammanundan, eftir góðu hálvmaratonkappingina í Cardiff á páskum, har hann kláraði OYL-kravtíðina, ein av favorittunum til at vinna. Hann kundi kortini vænta sær harða kapping frá brøðrunum Eiriki og Andrias Hansen úr Bragdið, sum høvdu sett nøsina eftir at kneyka Oyggjaleikakravtíðina, sum er 1 tími og 15 minuttir fyri teir knappar 21,1 kilometrarnar. Ætlanin var at danski stórrennarin Henrik Them, skuldi hjálpa teimum, men vegna mjadnaskaða, so fekk hann tíverri ikki hjálpt teimum á mál við hesum.

Henrik Them, Andrias Hansen, Eirikur Hansen og Jan Elmar Sørensen

Rennast skuldu fýra umfør á knappar 5,3 km. Eftir fyrsta umfar lógu teir fýra púra javnir, men eftir næsta umfar var Jan Elmar leysur frá Eiriki, sum eisini var leysur frá Andrias, meðan Henrik Them mátti gevast vegna skaðan. Tað hálvrunnið var, lógu Jan Elmar, Eirikur og Andrias allir nakað undir kravtíðina, so tað sá ógvuliga spennandi út hvussu leikur spældi av seinnu hálvu. Jan Elmar helt sina leiðslu á mál, sjálvt um ferðin hjá honum fór nakað niður, og gjørdist hann sostatt á fyrsta sinni føroyameistari í hálvmaraton, við tíðini 1.14.03 tímar, sum bert er átta sekund seinni enn hann rann í Cardiff, men kortini væl undir kravtíðina. 

Spenningur var nú hvussu útfallið hjá Eiriki og Andrias bleiv, men tíverri so bleiv tíðin á Eiriki á øðrumplássi 12 sekund omanfyri 1.15, men hann setti kortini persónligt met á teininum. Hjá Andriasi á triðjaplássi bleiv tíðin 36 sekund omanfyri 1.15. Teir báðir fara av landinum seinni í summar at royna aftur, og vónandi náa teir málinum tá.

Ungi Treystarennarin Julian Gregersen gjørdist nummar fýra við persónligum meti, sum nú er 1.18.06, frammanfyri vinnaran frá seinast, Martin Gravesen, sum eisini setti persónligt met á fimtaplássi við 1.18.21.

Hjá kvinnunum var tað enn einaferð Rigmor N. Arge úr Hvirluni, sum bleiv føroyameistari og hesaferð var tíðin hjá henni 1.31.13. Á øðrum- og triðjaplássi komu ávikavist Astrid Joensen úr Roysnið við 1.39.08 og Birna M. Joensen úr Hvirluni við 1.39.58.

Heini Gregersen rann seg til eitt flott triðjapláss í veteranbólkinum

Rani Nolsøe (í gulum) rann seg til eitt triðjapláss í superveteranbólkinum.

Fremstu kvinnur í bæði opna- og veteranbólkinum f.v: Astrid Joensen, Rigmor N. Arge og Birna M. Joensen

Gott lag á teimum “gulu” rennarunum. Málið var undir 2 tímar og tað náddu tey

Rennararnir á veg norður eftir Nólsoyar Pálsgøtu beint eftir startin – ein vøkur sjón

Stuttligt at síggja nógvar suðuroyingar renna hálvmaraton í gøtunum í Klaksvík

F.v. Arnfinn Johannessen, Súni Jacobsen og Andrass Joensen

John og Rósa Syderbø. Hann rann hálvmaraton og hon motiónsrenning

Regin Jóanesarson frá Vestmanna, sum er føddur í 1945, var dagsins elsti luttakari í hálvmaraton

Myndirnar hevur Jóannes N. Poulsen tikið.

ÚRSLIT FM HÁLVMARATON 2016