”Kaj Leo Holm Johannesen, fyrrverandi løgmaður, stillar upp fyri Sambandsflokkin til býráðsvalið í Tórshavnar Kommunu.” Tað boðar Sambandsflokkurin frá í morgun.
Gitingar hava verið um í eina tíð, at Kaj Leo møguliga fór at stilla upp, og fríggjadagin segði hann, at hann fór at taka endaliga støðu í vikuskiftinum. Nú er støðan tikin, og fyrrverandi løgmaður verður við á listanum hjá Sambandsflokkinum í Suðurstreymoy.
Kaj Leo er 52 ára gamal, er giftur og eigur 3 børn. Hann hevur fyrr sitið í Tórshavnar Býráð. Tað var í valskeiðinum frá 1996 – 2000. Ta ferðina valdi hann ikki at stilla uppaftur.
