Mánadagin tann 5. juni, grundlógardagin fyllir Freydis Poulsen 70 ár.
Mánadagin tann 5. juni, grundlógardagin, fyllir kend klaksvíkskvinna, Freydis Poulsen 70 ár.
Freydis er fødd á Kósini í húsunum hjá Dánjali Joensen, tann 5. juni í 1936. Hon er dóttir Jóhonnu F. Andreasen úr Tarti í Oyndarfirði og martin Poulsen, lærara, úr Svínáum.
Hon vaks upp í Klaksvík og tók realprógv í 1952. Hon arbeiddi í 3 ár í JFK Klædnabúð, var barnagenta á donskum haragarði í 1 ár, var arbeiðiskona í Reykjavík í knapt 2 ár og arbeiddi í tvey ár á Hotel Klaksvík.
Hon var í 3½ ár lærari í báðum kyndilsmessubygdunum, Haraldssundi og í Múla og frá august í 1964 lærari við Klaksvíkar skúla, seinastu árini við skúlan við Ósánna. Seinastu árini tó við skúlan á Oyri.
Eins og langabbin Joen Poulsen, ið skrivaði fyrstu føroysku bíbliusøguna og fyrstu stavingarbókina sjálvur og lesibókina saman við Chr. Ludvig Johannesen í 1891 er Freydis eisini skrivandi kvinna. Hon hevur skrivað bøkurnar, Skúlin í Árnafirði 100 ár og bókina um Oyndarfjørð, har hon eigur hús og har, ið føðingardagurin verður hildin. Harafturat er hon fremsti siðsøguligi frásøgupersónur í Norðoyum.
Norðlýsið ynskir hesi megnarkvinnu hjartaliga tillukku við degnum og blíðan byr framyvir.
mm.
