Myndarøð: 1.deild hjá KÍ vann tryggan sigur á B68, sum misti týðandi fet í oddastríðnum.
Undan dystinum lá KÍ á 7. plássi, meðan B68 lá á 3. plássi. Men eins og hjá Effodeildini, so hevur 1.deild hjá KÍ sera góð úrslit á heimavølli og tað kom til sjóndar aftur í dag. KÍ liðið hevði fleiri leikarar, sum hava royndir úr bestu deildini. Í dag vóru teir m.a. Sørmundur Kalsø, Jógvan Isaksen, Oddmar Marsten, Hjalgrím Elttør og Tórur Justesen. Á B68 liðnum vóru somuleiðis leikarar við royndum úr bestu deildini. Nevnast kunnu Jóhan Dávur Højgaard, André Olsen, Jann Ingi Petersen og Kristian Anton Andreasen.
KÍ var betra liðið og fekk eina 2-0 leiðslu í fyrra hálvleiki við málum frá Jóanis V. Petersen og Jógvan Isaksen. Beint eftir steðgin økti David Langaard við brotssparki. Móti endanum av dystinum minkaði B68 um munin, men samanumtikið var talan um tryggan sigur til KÍ, sum nú hevur vunnið 5 av sínum 6 heimadystum í ár. KÍ liggur mitt á stigatalvuni, meðan B68 misti eitt týðandi fet í toppstríðnum, har Skála og 07Vestur liggja frammanfyri B68, sum er nummar 3.
