Eftir tvey tap á rað kom Klaksvíkingur afturíaftur og vann seg framum aftur. Nú er 3-2 til Klaksvíking undan teimum báðum síðstu FM-róðrunum.
Klaksvíkingur fekk betra startin og hevði leiðsluna allan vegin á Skála í dag. Tað var spennandi, men kanska ikki líka javnt sum hinar róðrarnar, tí Klaksvíkingur var áleið hálva bátslongd frammanfyri stóran part av seinna parti av teininum. Hetta var eisini munurin á málinum.
Komandi vikuskiftið er Vestanstevna, og tá kann FM blíva avgjørt, tí kravið er til Norðing at vinna.Vinnur Norðingur, so fellir avgerðin á ólavsøku.
KRF fekk tríggjar aðrar sigrar í dag. Fípan Fagra barnaróður dreingir, Fípan Fagra dreingir 17-18 ár og Nevið Reyða vunnu sínar róðrar.
