Munnligur fyrispurningur til Hans Paula Strøm, landsstýrisman frá Bjørn Kalsø, løgtingslimi:
1. Tekur landsstýrismaðurin undir við uppskotinum frá yvirlækna á Suðuroyar Sjúkrahúsi, um at fremja fleiri skurðviðgerðir á smærru sjúkrahúsunum, fyri at stytta um bíðitíðirnar?
2. Fer landsstýrismaðurin at gera nakað fyri at smærru sjúkrahúsini í framtíðini kunnu gera fleiri skurðviðgerðir enn higartil?
Viðmerkingar: Í samgonguskjalinum stendur at: “Sjúklingar skulu hava betri tænastu, sjúklingaumboð setast, viðgerðar-ætlanir gerast fyri høvuðssjúkuøkini, og bíðitíðirnar styttast stigvíst móti tveimum mánaðum”.
Um dagarnar hoyrdist í Útvarpinum, at skurð- og yvirlækni á Suðuroyar Sjúkrahúsi mælti til, at fleiri skurviðgerðir í framtíðini verða framdar á sjúkrahúsinum á Tvøroyri.
Sambært sama lækna hevði tað stytt munandi um bíðitíðirnar hjá sjúklingum, ið skulu leggjast undir skurð, um fleiri skurviðgerðir høvdu verið framdar á smærru sjúkrahúsunum. Landssjúkrahúsið hevði tá eisini havt betri møguleikar og umstøður at tikið sær av serligum skurðviðgerðum innan sergreinar, sum ikki eru møguligar at fremja á smærru sjúkrahúsunum. Tí hesir spurningar til landsstýrismannin:
