Á flaggdegnum 2016 hava gott 150 føroyskir LGBTarar vent sær
persónliga til allar 33 løgtingslimirnar við eini síðstu, innilig
áheitan um at tey atkvøða ja til at broyta hjúnabandslógin í morgin.
Tað er lívið hjá hesum føroyingum, ið hava undirskrivað áheitanina,
ein møgulig komandi lógarbroyting kemur at ávirka. Hetta er fyrstu
ferð, at so nógvir samkyndir, tvíkyndir og tvørkyndir føroyingar hava
staðið fram alment og persónliga lagt navn til ynskið um at fáa
lógarbroytingina viðtikna týsdagin.
Áheitanin, sum á sjálvum flaggdegnum er persónliga send til allar
løgtingslimirnar, er so ljóðandi:
INNILIG ÁHEITAN TIL FØROYA LØGTING – SAMGONGU EINS OG ANDSTØÐU
Atkvøðið ja til lógaruppskot 19/2015 og gevið okkum somu borgarligu
rættindi sum tit og aðrir føroyingar hava
Í góð 5 ár hava vit í LGBT Føroyum teskað, tosað, kjakast, rópt og
enntá ýlt um vantandi javnrættindi og vantandi rúm fyri okkum í
føroysku hjúnabandslógini.
Øll argument, bæði fyri og móti, eru seinastu árini komin undan kavi,
og eru hesi vend óteljandi ferðir. Øll hugsandi fólk, bólkar, feløg og
stovnar eru hoyrd, og hvørt blað er vent í hesum máli. Eftir stendur
eitt púra greitt lógaruppskot, sum tit løgtingsfólk umsíðir skulu
atkvøðu um.
Vilja tit loyva okkum at giftast borgarliga í Føroyum við tí, sum vit
elska og ynskja at víga okkara lív?
Ja ella nei.
Ynskja tit at veita okkum javnrættindi, ið tit og flest aðrir
føroyingar taka fyri givið?
Ja ella nei.
Við síðstu lógarbroytingini eru allar hugsandi og óhugsandi
lógarsmogur afturlatnar, so vit ikki skulu kunna signast í føroysku
Fólkakirkjuni ella øðrum samkomum. Her er einki grátt øki longur –
ikki fleiri orsøkir ella umberingar fyri ikki at veita okkum
javnrættindi. Einki meira rundanumtos ella óynskt uppskot um serlógir,
ið áhaldandi fara við okkum sum annanfloksborgarar. Tíðin er farin
frá: “kanska”, “men” ella “bara um”.
Tað eru nú bara tvey svør eftir at velja millum: ja ella nei.
Tí senda vit undirritaðu, ið øll eru LGBTarar, eina seinastu, inniliga
bøn til tykkum fólkavaldu í samgongu eins væl og í andstøðu:
Gevið okkum eina orsøk til at seta búgv í Føroyum, so vit kunnu halda
fram við at geva okkara íkast til at byggja land saman við tykkum og
øllum øðrum føroyingum. Vit velja Føroyar, og ynskja einar Føroyar, ið
velur okkum!
Gerið tað einasta rætta í dag – eins og í øllum komandi søgubókum –
atkvøðið ja til lógaruppskotið 19/2015.
Takk fyri.
vh.
Nevndin í LGBT Føroyum
