Sunnudagin mátti Team Klaksvík lúta fyri H71, sum vunnu oddadystin 27-24, men samstundis tapti StÍF fyri Kyndli, so klaksvíkingar varðveittu annaðplássið.
Hjá Team Klaksvík ræður nú um at halda fast um annaðplássið í 1. deild, sum gevur dyst um uppflyting í Atlantic Airways deildina.
Tað var annars ikki so langt frá einum sigri til Team Klaksvík í dystinum, sum varð spældur í Badmintonhøllini sunnudagin, tí vitjandi oddaliðið úr Hoyvík vann sum nevnt dystin við einans trimumm málum, 24-27.
Hevði StÍF vunnið sín dyst ímóti Kyndli, høvdu strandingar, við einum dysti færri, komið upp á sama stigatal sum Team Klaksvík, men her rættu teir grønu í Havn eina hjálpandi hond til klaksvíkingar við at vinna 32-27 á StÍF.
Sostatt hevur Team Klaksvík framvegis góðar møguleikar at halda fast um annaðplássið í 1. deild.
Sambært kappingarskránni á www.hsf.fo er næsti dystur hjá Team Klaksvík longu nú mikukvøldið, og tað er ímóti júst StÍF í ítróttarhøllini á Skála, so har er talan um ein sera avgerandi og spennandi dyst.
Støðan í 1. deild:
1) H71 15 dystir +130 mál 26 stig
2) Team Kl. 16 dystir + 12 mál 18 stig
3) StÍF 15 dystir + 0 mál 16 stig
4) VÍF 17 dystir – 3 mál 14 stig
5) Neistin 16 dystir – 97 mál 12 stig
6) Kyndil 17 dystir – 42 mál 10 stig
