Samstundis sum mótmælistiltak verður í Havn leygardagin, mótmæla útisetar eisini í fleiri býum uttalands.
Samstundis sum mótmælistiltak verður í Havn leygardagin, mótmæla útisetar eisini í fleiri býum uttalands.
“Vit eru nógvir útisetar, sum sita rastleysir og ynskja, at vitkundu verið við til mótmælistiltakið á Vaglinum leygardagin”, sigur Enter Føroyar, sum er bólkur av føroyskum útisetum.
Tí skipar bólkurin fyri mótmælistiltøkum í Keypmannahavn, Reykjavík, München, Århus, Odense og Esbjerg – og bólkurin vónar, at fleiri býir leggjast afturat.
Føroysku útisetarnir vilja standa saman við mótmælisfólkunum í Føroyum og vísa á, at tað, sum fer fram á politiska pallinum í Føroyum í hesum døgum, ikki kann góðtakast. Tey taka undir við nógvum av føroysku fakfeløgunum, ið halda, at tað, sum gongur fyri seg á politiska pallinum, er ørkymlandi. Fakkunnleikin verður ikki virdur, og týdningarmikil mál verða ikki viðgjørd við tí álvara, sum tey hava uppiborið, men í stóran mun tagd burtur.
“Vit stúra fyri framtíðini í Føroyum. Fólkaræðið stendur fyri falli, og hetta kunnu vit sum føroyskir útisetar og møguligir komandi borgarar í Føroyum ikki góðtaka”, sigur bólkurin av føroyskum útisetum.
Skráirnar fyri mótmælistiltøkunum í ymsu býunum verða lagdar út á Facebook í dag og í morgin. Felags fyri øll mótmælistiltøkini er, at tey byrja kl 14.00 føroyska tíð.
Bólkurin av útisetum, ið er óheftur politiskt, heitir á útisetar um allan heim at skipa fyri mótmælistiltøkum leygardagin.
“Býrt tú í einum landi ella býi, har onki mótmælistiltak enn er fyriskipað leygardagin, og kundi tú hugsað tær at mótmælt? Jamen so ger tað! Skipa fyri einum mótmælistiltaki sjálv/ur”, er áheitanin frá bólkinum.
Tey heita í hesum sambandi á fólk um at venda sær til bólkin Enter Føroyar, um tey vilja hava hjálp við fyriskipanini í sínum býi ella landi.
Til ber at kunna seg meira um tiltøkini her:
