Bjørt Samulesen tingkvinna hevur sett landstýrskvinnuni í náttúruverndarmálum Sirið Stenberg soljóðandi fyrispurning til tingfundin í morgin kl. 11
* Nær fáa Føroyar eina veruliga náttúruverndarlóg?
* Hvussu langt er komið áleiðis at smíða uppskot til náttúruverndarlóg og nær væntar landsstýriskvinnan at leggja uppskotið fram?
* Hvørji umhvørvis- og náttúruøki fara at verða betri vard í mun til í dag?
* Verða eitt nú ásetingar um vernd av hóttum fugla-, djóra- og plantusløgum, viðbreknum lendi, áum og vøtum?
* Er fíggjarlig og umsitingarlig orka sett av til at umsita lógina væl?
* Eru fak- og áhugabólkar, við besta innliti í náttúruvernd, við í arbeiðinum, og um ja, hvørjir?
Viðmerkingar:
Føroyar hava eina náttúrufriðingarlóg, men onga náttúruverndarlóg. Friðingarlógin kann røkka parti av umhvørvis- og náttúruverndini, men ikki allari. Fá lond er so beinleiðis og í flestu lutum so ella so tengd at náttúruni, sum Føroyar eru. Tó verður ikki mett, at umhvørvið, viðbrekin náttúruøki, djóra- og plantusløg eru nóg væl vard við verandi friðingarlóggávu.
Í samgonguskjalinum verður greitt staðfest, at: “Umhvørvis- og náttúruvernd skulu uppraðfestast til gagns fyri verandi og komandi ættarlið. “ Landsstýriskvinnan hevur alment boðað frá, at arbeitt verður við hesum, men enn er eitt lóggaruppskot ikki komið til viðgerðar.
