Klaksvíkar Býráð fer á fundi í kvøld at viðgera eitt mál um nýggjan húsarhaldsskúla í miðbýnum.
Húsarhaldsskúli Føroya hevur seinastu árini arbeitt við at fáa nýggjan skúla til endamálið, millum annað tí at eftirspurningurin eftir tilboðunum á skúlanum er nógv størri, enn verandi karmar loyva. Harumframt eru verandi karmar sera ótíðarhóskandi, stendur í fundarskránni fyri býráðsfundin.
Húsarhaldsskúlin hevur saman við avvarðandi mynduleikum arbeitt við eini byggiskrá, ið nú endaliga er liðug og verður eftir ætlan handað landsstýriskvinnuni áðrenn mánaðarskiftið. Fyri at verkætlanin kann gerast veruleiki, er tørvur á, at kommunan játtar sín part av stuðlinum til verkætlanina, og tí hevur Húsarhaldsskúli Føroya sent kommununi umsókn um stuðul.
Býráðsfundurin í kvøld byrjar klokkan 17:30.
(Les meira um Húsarhaldsskúlan í Norðlýsinum sum kemur út í morgin)
