Tann 1. apríl varð øll tolling av pakkum o.ø. flutt til Havnar og við hesum er arbeiðið á Posthúsinum í Klaksvík munandi minkað og posthúsið letur nú ikki upp fyrr enn kl. 10
Nú ber ikki longur til hjá vinnuni og privatfólkum at fáa pakkar o.a. tollað á posthúsinum í Klaksvík.
Allir pakkar skulu nú til Havnar at tollast og avgreiðast.
Er pakkin ikki avgreiddur ella ikki komin noyðist kundin at venda sær til posthúsið í Havn!.
Eingin av starvsfólkunum í Klaksvík ynskja at úttala seg, men sum skilst so er arbeiðið munandi minkað á posthúsinum síðan broytta arbeiðsgongdin kom í gildið .
– Nú verður roknað við uppsagnum í Klaksvík – men broytta mannagongdin fer at merkja, at ikki verður neyðugt at siga fleiri fólkum upp á posthúsinum í Havn, segði eitt av starvsfólkunum, sum vit tosaðu við.
Upplatingartíðirnar broyttar
Í tráð við minkandi arbeiði á Posthúsinum í Klaksvík hevur postverkið nú avgjørt at broyta upplatingartíðirnar til kl. 10. Áður lótu dyrnar upp kl. 9 á morgni.
Sum skilst merkir hetta at tænastan hjá vinnulívinum og borgarunum í Klaksvík verður verri, verður sagt. Tænastan í miðøkinum verður tó óbroytt.
Tað hevur ikki eydnast okkum at fingið viðmerkingar frá leiðsluni í postverkinum men tað verður skjótast gjørligt.
