Bólkurin við tí fangandi tónleikablandinum spælir á Summar Festivalinum í august
Punjab hevur seinastu árini sett veruligt lív í føroyskan tónleik. Bólkurin spælir alternativan funk-rock við jazzíblástri og er nakað heilt fyri seg á tónleikapallinum í Føroyum.
Bólkurin Punjab var stovnaður í 2012, og í fjør góvu teir fyrstu útgávuna, The Flying Elephant, út. Teir hava eisini gjørt vart við seg við framførslum á størri og smærri tiltøkum og konsertum kring landið.
Framførslurnar hjá Punjab eru lívligar og grundaðar á framúr samanspæl hjá dugnaligum tónleikarum. Teir hava skrivað frálíkar sangir og lagt til rættis sera fangandi tónleik.
Nú er tíðin komin, at Punjab vitjar landsins størsta tónleikatiltak, og í august mánaði fer Punjab at seta lív í stóra tjaldið á Summar Festivalinum.
