Magnus Heinason er just afturkomin av rannsóknarferð, har endamálið var at kanna gýting hjá makreli í økinum kring Føroyar. Kanningarnar gingu væl og vístu, at daggomul rognkorn av makreli vóru at finna á flestu støðum, serliga sunnanfyri.
Magnus Heinason er just afturkomin av rannsóknarferð, har endamálið var at kanna gýting hjámakrelií økinum kring Føroyar. Kanningarnar gingu væl og vístu, at daggomul rognkorn av makreli vóru at finna á flestu støðum, serliga sunnanfyri. Frá tí at makrelur gýtur rogn út í sjógvin til rognini klekjast ganga fleiri dagar, og í hesum tíðarskeiði kunnu rognini reka langa leið. Fyri neyvt at vita hvar makrelur gýtur, verða tískil bert tey daggomlu rognkornini tald. Daggomul rognkorn eru tí greitt tekin um, at makrelur gýtur har hesi eru fingin. Myndin niðanfyri vísir siglingarleiðina hjá Magnusi Heinasyni og sirklarnir vísa, hvar royndir vóru tiknar. Daggomul rognkorn (bláir rundingar) vóru funnin á flestu støðum sunnanfyri, men væl minni var at síggja norðanfyri.
Umframt kanningar av rognkornum, vórðu eisini aðrar kanningar av makreli gjørdar. Á myndini til høgru verða royndir tiknar fyri at lýsa aldurs- og kynsbýti, umframt longd, vekt og búningarstig. Eisini vórðu royndir tiknar til genetiskar kanningar av makreli.
Enn ber ikki til at siga nakað um tal av rognkornum í prøvunum; hetta arbeiði fer nú í gongd, og úrslitini skulu latast ICES seinni í juni, og verða tá, saman við úrslitunum hjá hinum londunum, brúkt í stovnsmetingararbeiðinum av makreli.
Kanningin er liður í stórum altjóða granskingarsamstarvi, samskipað av ICES, hvørs endamál er at kanna gýting hjá makreli í økinum frá suðurstrond Portugals norður til okkara leiðir í tíðarskeiðnum frá januar til juli.
