Fylgissveinamynd frá middegi í dag. Eitt sindur óruddiligt um okkara leiðir. Miðjan í tí veika lágtrýstinum er beint vestan fyri Suðuroyggjar (Hebridurnar). Nógv brúgvaløg við avfalli, men lítil megi er í lágtrýstinum. Tí er fyri tað mesta skýggjað veður. Avfallið, sum er í dag, er íkomið av fjøllum (orografiskt)
Tey ganga beint á okkum fyri tíðina – lágtrýstini av Nýfunnlandsleiðini. Tey halda fyrst eina leið beint vestur í hav, og so haðani ímóti Føroyum. Tað eru viðurskiftini ovarlaga í lufthavinum, sum gera hesa leiðina. Leiðin líkist nokkso henni sum var á jólum – lágtrýstini líkjast tó als ikki, hvussu djúp tey eru o.s.fr.
Lágtrýstini steðga nakað sunnan fyri Føroyar – fara ikki framvið. Tá ið luftin soleiðis melur um lágtrýstini sunnan fyri okkum, er ættin skiftandi, hvaðani luftin kemur til Føroya – alt velst um, hvussu nær tey eru komin.
Skal ættin og veðrið, sum hevur verið seinastu dagarnar, broytast, mugu viðurskiftini í erva eisini broytast. Tað skulu vit ikki rokna við fer at henda ta næstu vikuna.
So veðrið fer at vera skiftandi næstu dagarnar.
Í dag er suðurætt og landsynningur, skýggjað veður, sólglottar ella ælingar í støðum.
Í morgin kann væntast høgætt, norðan og útnyrðingur; týsdagin er ættin komin niður í sunnan og landsynning; mikudagin og hósdagin ímillum útsynning og landsynning; fríggjadagin ímillum vestan og sunnan.
Góðan sunnudag.
