Tað gongur framá við koppsetingini av føroyingum, og nú eiga tey, ið eru 55 ár og eldri, tørn.
Seinastu vikurnar er meira koppingarevni komið til landið, og tí er ferðin á koppsetingini í løtuni væl hægri enn áður.
Mikukvøldið kom nýggj sending av Pfizer/BioNTech við tilsamans 5.200 skamtum av koppingarevni. Størri parturin av sendingini fer til at koppseta nýggj fólk, og enn eru tíðir tøkar á corona.fo.
Tí hevur Sjúkrahúsverkið í dag valt at seta aldursmarkið enn meira niður, so øll, sum eru 55 ár og eldri, kunnu bóka tíð.
