Leygarkvøldið 23. august verður ársins konsert í Klaksvík. Konsertin kallast Landaplágur á palli, og tað verða nakrir av teimum bestu sangarum úr Klaksvík, sum fara at syngja sínar kendastu sangir hetta kvøldið.
Listastevna Føroya verður í hesum døgum hildin í Havn, og nú hendan mentanarstevna ikki longur røkkur til Klaksvíkar, er tað gyltur møguleiki hjá norðoyingum at leita sær á eina fólksliga konsert, sum fer at bjóða fyrsta floks tónleik. Og tað verður ikki hissini undirhald, tí á pallinum verða nakrir av teimum kendastu sangarunum úr Klaksvík, og teir fara at geva fólki eina hittparadu av teimum frægu. Sangararnir á konsertini verða: Jákup Marnar Anthoniussen, Karl Martin Samuelsen, Steintór Rasmussen, Birgir Sigurðsson, Arnfríð Lützen, Jógvan Hansen og Hans Jacob Nystrøm. Hesi fólk hava sungið eina ørgrynnu av kendum sangum landaplágum og á konsertini verða sangir sum Føroyar, Til allar vinir, Heldur Akker Títt, Breaking my Heart og nógvir aðrir at hoyra Ein bólkur við dugnaligum tónleikarum fer at spæla undir, og í hesum bólki spæla Magni Husgaard, Erik Biskopstø, Høgni Klakkstein og Hjalti Joensen. Gunnar Nolsøe verður vertur. »Landaplágur á palli« er føðingardagskonsert hjá KÍ, nú felagið fyllir 99 ár. Konsertin verður í KÍ-høllini leygarkvøldið 23. august kl. 21.00 og varðar í umleið 2 tímar. Tað eru nógv ár síðani, at ein slík konsert varð fyriskipað í Klaksvík, men nú hava norðoyingar og onnur so møguleikan at hoyra nakað av tí besta, sum er skrivað av føroyskum tónleiki.
