Tjóðpallur Føroya søkir eftir stjóra at seta í starv frá 1. februar 2020. 

Tjóðpalsstjórin hevur listaligu og fyrisitingarligu ábyrgdina av týdningar­mesta almenna mentanarstovninum, tá ræður um føroyska yrkisleiklist. 

Førleikakrøv 

Vit vænta at umsøkjarar hava: 

• Leiklistaliga, leiklistafrøðiliga útbúgving ella samsvarandi royndir innan leiklistaliga økið. 
• Útbúgving ella royndir innan leiðslu, fyrisiting og fíggjarstýring. 
• Visjónir fyri føroyskari leiklist og fyri framtíðar føroyska Tjóðpallin. 
• Evnini og viljan at samstarva breitt, við allar týðandi tættir í føroyska leiklista- og mentanarumhvørvinum. 
• Áræði og evnini at vera ein virkin viðleikari í skapanini av nýggja Tjóðleikhúsinum. 
   

Lønar- og setanarviðurskifti 

Starvið er áramálssett til 5 ár, og lønt sambært 37. lønarflokki í sáttmála millum Føroya Tænastumannafelag og Fíggjarmálaráðið, tó uttan at vera tænastumannastarv. Eru spurningar um starvið, ber til at venda sær til forkvinnuna fyri Leiklistaráðið, Ingibjørg Berg, á telefon 213080 ella á ingibjorg@commit.fo. 

Umsókn við prógvum og lívsgongdarlýsing (CV) kann sendast til ingibjorg@commit.fo. Umsóknin skal vera okkum í hendi í seinasta lagi 6. januar 2020 kl. 12.00.

Tjóðpallur Føroya hevur eina árliga fíggjarætlan á 5.999.000 kr. við 5.151.000 kr. í almennari  rakstrarjáttan og umleið 848.000 kr. í eginfígging. Á stovninum starvast, umframt stjóran, 1 skrivstovufólk og í ársmiðal 10-12 verkætlanarsett starvsfólk í styttri ella longri tíðarskeið. Tjóðpallurin setur í miðal 4 leikverk upp um árið. Karmar fyri Tjóðpallin eru at finna í Lóg um Tjóðpall Føroya frá 2003.