Tey sum seinastu dagarnar hava ferðast við skipum og bussum hjá Strandfaraskipum Landsins og Bygdaleiðum hava uttan iva lagt til merkis, at eitt blað við navninum ”Fólk á ferð” er komið at liggja har.
Blaðið er eitt royndarátak hjá Strandfaraskipum Landsins at kunna um virksemið hjá stovninum.
Í fyrstu útgávuni verður m.a. greitt frá, hvussu umfatandi virksemið hjá Strandferðsluni er, hvat ið virksemið kostar, og at nýggjur HR-leiðari er settur. Eisini verður skrivað um at Smyril hevur skift frá tungolju til gassolju, og at nýggju tyrlurnar hjá Atlantsflogi kunnu skapa nýggjar møguleikar á útoyggj.
Harumframt verður tosað við starvsfólk, sum hava starvast á Strandferðsluni í meira enn ein mansaldur. Tórfríð Johannesen greiðir frá, hvussu tað er at halda skansan á rutuupplýsingini á Farstøðini, og Petur Winther og Magnus Hjelm hava júst havt hvør sín 40 ára starvsdag.
”zBlaðið er eitt royndarátak, og eydnast tað væl, halda vit fram við tí. Strandferðslan røkkur út í hvønn krók í landinum, og nógvar søgur kunnu tí sigast í blaðnum, ikki bara um okkum, men eisini um m.a. bygdir, oyggjar, ferðavinnu, náttúrufyribrigdi og søgu í Føroyum,“ sigur Hilmar Eliasen, stjóri á Strandfaraskipum Landsins.
