Leingi lá klaksvíkingurin Ólavur Simonsen fremstur í samlaðu støðuni í Grand Prix kappingini, men nú allar 9 kappingarnar eru loknar, endaði Olaf Berg úr Sandavágs Talvfelag fremstur.
Eftir at seinasti leikur var leiktur í drúgvu Grand Prix kappingini 2007/08, sum fevndi um heili 9 kappingar samanlagt, var Olaf Berg, úr Sandavágs Talvfelag, samanumtikið, sera tryggur sigursharri.
Olaf vann kappingina við 34,3 stigum, meðan Ólavur Simonsen úr Klaksvíkar Talvfelag gjørdist nr. 2 við 29,3 stigum. Torkil Nielsen, úr Sandavágs Talvfelag, bleiv nr. 3 við 26,3 stigum.
Nummar fýra í samlaðu støðuni gjørdist Finnbjørn Vang úr Klaksvík, sum eins og Ólavur hevði eina sterka byrjan í Grand Prix og lá til eitt heiðursmerkjapláss, men hann endaði tó sum nr. 4, sum eisini er eitt gott úrslit.
Kappingina um Grand-prix styrkisvirðislønirnar vunnu:
1. virðisløn – Rógvi Egilstoft Nielsen, úr Sandavági
2. virðisløn – Jónfinn Thomsen, úr Sandavági
3. virðisløn – Høgni Egilstoft Nielsen, úr Sandavági
4. virðisløn – Johan Hentze, úr Havnar Telvingarfelag
Sostatt gjørdist Sandavágs Talvfelag tann heilt stóri sigursharrin. Felagið gjørdi eitt satt hál, nú teir vunnu 5 av 7 møguligum plaseringum ! At Nielsen-feðgarnir eiga 3 av hesum, ger ikki úrslitið minni merkisvert.
Undan finaluni, sum varð telvað leygardagin í hølunum hjá Havnar Telvingarfelag, hevði Olaf eina leiðslu uppá 3 stig til argasta kappingarneytan Ólavur Simonsen úr Klaksvíkar Talvfelag, sum lá í oddinum meginpartin av Grand Prix kappingini.
Men Olaf Berg var ósvitaliga tryggur í finaluumfarinum og økti um leiðsluna við 2 stigum.
22 telvarar møttu til finaluna – harímillum, á fyrsta sinni, IM Helgi Dam Ziska – og eftir at 9 umfør vórðu telvað, endaðu Olaf og Helgi javnir í oddinum við 7½ stigi, meðan Ólavur Simonsen gjørdist nr. 3 við 7 stigum. Innanhýsis talvið ímillum Olaf og Helga endaði við javnleiki.
Styrkisvirðislønirnar vunnu Arnbjørn Ó. Dalsgarð, Heiðrikur T. Jacobsen, báðir úr Havnar Telvingarfelag og Heðin Gregersen úr Klaksvíkar Talvfelag.
Endastøðan í GRAND PRIX 2007/08:
1) Olaf Berg 34,30 stig
2) Ólavur Simonsen 29,30 stig
3) Torkil Nielsen 26,30 stig
4) Finnbjørn Vang 20,10 stig
5) Herluf Hansen 12,30 stig
(Kelda: www.faroechess.com)
