Hvønn hósdag seinnapart hittast um 12 konur í Smæruni – í kjallaranum í Sambýlinum á Heygnum, har tær seyma saman puntar til teppir.
Hesir puntarnir eru bundnir um at kalla alt landið og verða so sendir til Smæruna í Klaksvík at seyma saman til teppir.
Í hvørjum teppi eru 88 puntar, og hava tær í ár seymað 45 teppir. Teppini fær Absalon Matras, sum hevur tey við sær sum gávur til fólk, hann stuðlar í Rumenia.
Tær byrjaðu at seyma hesi teppi í 2014, og hava tær síðani tá seymað 148 teppir – ella tilsamans 13.024 puntar.
Nú í dag høvdu tær eina hugnaløtu við einum betri drekkamunni og hugdu at ársins verki, sum tær fegnaðust um at kunna verða øðrum, ið treingja, til góða nyttu.
Samstundis fara “Teppidamurnar” í Smæruni í summarfrá, men byrja gleðiliga aftur út á heystið.
