Landsstýrismaðurin í almanna- og heilsumálum, Hans Pauli Strøm, gjørdi mikudagin 24. mai 2006 av at geva 9 umsóknum tilsøgn um studningslán til bygging av eldrabúplássum.
Landsstýrismaðurin í almanna- og heilsumálum, Hans Pauli Strøm, gjørdi mikudagin 24. mai 2006 av at geva 9 umsóknum tilsøgn um studningslán til bygging av eldrabúplássum.
Hetta fer at útvega 136 nýggj eldrabúpláss kring landið.
Svar er sent øllum umsøkjarum í postinum.
Hans Pauli Strøm upplýsir, at tað er álagt honum sambært lóggávuni at hyggja eftir tørvinum á eldrabúplássum kring landið, og tað er út frá hesi fyritreyt, at hann hevur gjørt av at veita stuðul til fylgjandi økir:
Suðurstreymoy:
- Bygging av ellis- og røktarheimi við Hoyvíkstjørn til 24 búfólk, studningslán 12 mió. kr.
- Røktarheim á Boðaneshamri til 24 búfólk, studningslán 12 mió. kr.
- Reststuðul til røktarheimið Tjarnargarð, kostnaður 280 tús. kr.
Í alt hevur landsstýrismaðurin gjørt av at veita góðar 24 mió. kr. til verkætlanir í Tórshavnar kommunu, sum fara at geva í alt 48 nýggj búpláss.
Suðuroyggin:
- Bygging av eldrasambýli á Tvøroyri til 16 búfólk, studningslán 800 tús. Kr.
- Bygging av røktarheimi í Vági til 24 búfólk, studningslán 12 mió. kr.
Hesar játtanir skuldu gjørt at allur tørvurin í Suðuroynni verður nøktaður.
Vestari partur av Heimarøktarøki 2, sum fevnir um Vestmanna, Kvívík, Leynar, Stykkið, Skæling, Vágar og Mykines:
- Bygging av eldrasambýli í Sørvági til 10 búfólk, studningslán 500 tús. kr.
- Bygging av ellis og røktarheimi í Vestmanna til 24 búfólk, studningslán 12. mió. kr.
Hesar játtanir skuldu gjørt at allur tørvurin í Vágum og Norðstreymi verður nøktaður
Norðoyggjar:
- Bygging av eldrasambýli í Svínoy til 8 búfólk, studningslán 400 tús. kr.
Eysturoyggin:
- Víðkan av eldrasambýlinum í Gøtu frá 10 til 16 búpláss, studningslán 300 tús. kr.
Henda játtan skuldi gjørt at allur tørvurin í Eysturoynni verður nøktaður
Samanumtikið:
Talan er sostatt um tilsagnir uppá íalt góðar 50 mió. kr., ið sum nevnt fara at geva 136 nýggj eldrabúpláss tey næstu 2-3 árini.
Tørvskanningin, sum varð handað landsstýrismanninum í juli 2005 vísir, at tørvur er á 151 eldrabúplássum kring landið.
Við hesum er nærum komið á mál, og fegnast landsstýrismaðurin um, at politiskur vilji er frá bæði lands- og kommunumyndugleikum til at taka hesi stóru stig til frama fyri okkara gomlu, sum hava hesa røkt og umsorgan fyri neyðini.
Tórshavn, hin 26. mai 2006
Almanna- og heilsumálaráðið
