Tunlar norður um Fjall falla allarhelst
Í gjár varð greitt, at meirilutin í Rættarnevndini mælir frá at framskynda tunlarnar norður um Fjall. Tí verður uppskotið helst ikki samtykt.
Meirilutin førir millum annað fram, at møguleikin at breiðka teir verandi tunlarnar og víðka teir, er ein møguleiki, sum má kannast nærri, áðrenn tað kann útihýsast. Hetta er nakað, sum fer at taka tíð. Eisini óttast meirilutin, at tað fer at skapa fordømi, um onnur enn Landskassin eru við at fíggja og gera tunnilsverkætlanir, og mælir til, at alt framhaldandi liggur hjá Landsverki.
Í meirilutanum eru Kristin Michelsen (C), Ruth Vang (F), Ingolf Sólheim Olsen (E) og Sonja Jógvansdóttir.
Hini í nevndini mæla til at taka undir við uppskotinum. Tey vísa á, at sambært langtíðarætlanini fer tað at taka 4 ár, áðrenn farið verður í gongd, og at tað fer at taka nøkur ár afturat, fyrrenn koyrandi er. Tey meta ikki, at fólk í Árnafirði og Eystan Múla kunnu bíða so leingi.
Í minnilutanum eru Magnus Rasmussen (A), Elsebeth M. Gunnleygsdóttir (A) og Edmund Joensen (B).
Ein lítil møguleiki var fyri, at einstakir samgongutinglimir kortini fóru at taka undir við at framskunda verkætlanina, men tey fara neyvan at ganga ímóti tilmælinum frá meirilutanum, og tað merkir, at onki verður gjørt við nýggjar tunlar norður um Fjall í hesum valskeiðnum.