Fimm prosent møguleiki fyri at KÍ vinnur FM søguliga sæð
Tað er hent einaferð tey 19 árini, har kappast hevur verið um FM í 27 umfør, at FM-vinnarin hevur ligið seks stig ella fleiri aftanfyri nr. 1 eftir seks umførum.
KÍ hevur tapt stórsteypadystin og er úti av kappingini um løgmanssteypið. Í landskappingini hava vit skrivað, at KÍ eisini er úti av FM-kappingini, um ikki okkurt martkant broytist. Og hvussu sannlíkt er tað, um vit hyggja søguliga sæð?
Sambært FaroeSoccer er tað hent einaferð hesi 19 árini, har spælt hevur verið í 27 umfør, at ein føroyameistari hevur megnað at vunnið FM, sum hevur verið seks stig ella meir aftanfyri nr. 1 eftir seks umførum. Tað var í 2012, tá EB/Streymur var sjey stig aftanfyri Víking eftir seks umførum, men vann FM.
Rokna vit tað um til prosentir, so er tað søguliga sæð ein 5 prosent møguleiki, at KÍ vinnur FM í 2024.