Ein av elstu handlunum í Klaksvík er framvegis í menning og økir um sítt grundarlag.

Handilin sum tey flestu ídag kenna undir navninum SPORT 24, hevur langar røtur aftur í tíðina. Tað var heilt afturi í 1971, at Søren Z. Jacobsen og konan Morit stovnaðu matvøruhandilin Hjá Søren .

Ein deild av handli teirra gjørdist eisini ítróttarhandil og í umleið 33 ár var hendan deildin kend undir navninum Sportmaster. Í 2009 lat handilin eisini deild upp á Tvøroyri.

Í 2015 blivu feðgarnir Søren Z. Jacobsen og Hans Pauli Z. Jacobsen limir í stóru handilsketuni Sport 24, og síðani hevur tað eftir øllum at døma gingið sera væl. Deildin á Tvøroyri skifti eisini navn til Sport 24 og í Tórshavn lat ein Outlet handil eisini upp.

27. september í ár vaks handilin við Klaksvíksvegin um sítt fermetratal. Hans Pauli Ziska Jacobsen, sum í dag er dagligur leiðari fyri allar tríggjar handlarnar sigur, at tað var vorið ov trongligt í gomlu hølunum. Við at flyta ein part eina hædd upp, hava vit fingið knappar 100 fermetrar afturat teimum 150 vit høvdu frammanundan, so nú kunnu vit betur sýna okkara mongu vørur fram fyri viðskiftafólki okkara. Í dag hava vit skipað okkum soleiðis, at á ovaru hæddini er alt til konufólk og eisini svimjiklæði, í meðan manfólkaklæðini eru í niðaru hæddini.

Tilsamans arbeiða ídag útivið 20 starvsfólk hjá Sport 24 í Klaksvík, Havn og á Tvøroyri.