Við in.fo sigur Jógvan í Skorini, at hann fer at stuðla einum valevni av Eiði í at koma á ting, tí “man sær hvussu stóran týdning tað hevur havt fyri onnur øki í landinum” at hava ein persón úr tí økinum á Løgtingi. Hartil harmast hann um, at tann kontravektin, sum bláa Eysturoyggin og Norðoyggjar (“norðanfjørðs”, sum borgarstjórin málber seg) hava verið, nú verður máað burtur við at stilla “helst reyðasta persón í Føroyum” upp í Eysturoynni. Her sipar borgarstjórin til Sonju J. Jógvansdóttir, sum hóast hon býr í Havn, kortini verður stillað upp av Eysturoyar Tjóðveldisfelag.

Áður hevur Tórbjørn Jacobsen, borgarstjóri í Runavík og fyrrverandi tingmaður, landsstýrismaður og fólkatingsmaður fyri Tjóðveldi, givið til kennar, at hann ikki hevur høgar tankar um, at Eysturoyar Tjóðveldisfelag hevur átikið sær at stilla Sonju Jógvansdóttir upp.

Flyta vit okkum til Norðoyggjar, er tendensurin tann sami. Tjóðveldisflokkurin fekk yvir ein fjórðing av atkvøðunum til valið í 1998. Síðani tá er gingið aftur á hond til hvørt einasta val. 14,2% í 2015 var seinasta atkvøðuprosenttalið hjá Tjóðveldi í Klaksvík. Og har hevur eisini fyrrverandi borgarstjórin í Klaksvík, Steinbjørn O. Jacobsen, gjørt greitt, at tað er politikkurin hjá miðstaðarfólkunum í Tjóðveldi, ið er orsøkin, og nevndi hann tá ítøkiliga fiskivinnunýskipanina sum grund. Allar LGBT dagsskráirnar, ið eftirhondini hava sligið røtur í flokkinum, gera neyvan støðuna betur.

Líkt er sostatt til at Tjóðveldi er væl á veg at gerast ein havnarflokkur burturav. Í Norðoyggjum er longu øskukalt, meðan Eysturoyar Tjóðveldisfelag bløðir stórar profilar og veit sær ongi betri ráð enn at stilla eina kvinnu í Havn upp.

At uppstillingin fór at vera meira og meira konsentrerað og miðstaðarorienterað var eitt av vandamálunum, sum ávarað varð um, tá farið varð yvir til eitt valdømi. Ein dapur spádómur, sum nú gongur út.