TB hevur ikki vunnið móti KÍ í landskappingini á heimavølli síðani 1991. At talan fór at blíva um ein truplan dyst hjá KÍ var ikki óvæntað. Sum Norðlýsið vísti á í upptaktini, so hevur KÍ líka síðani 2012 havt tað trupult í Trongisvági, har eingin sigur hevur verið størri enn við einum máli, og har heimaliðið fleiri ferðir hevur fingið stig og fleiri ferðir hevur verið nær við. Í fjør bleiv KÍ sligið út úr kappingini um løgmanssteypið í Trongisvági. 

TB vann 1-0 við máli frá Teiti Olsen eftir hornasparksstøðu í seinna hálvleiki. Í seinna hálvleiki fekk Deni Pavlovic beinleiðis reytt kort, og tað ger hendan dystin bara heilt miseydnaðan fyri KÍ. Tí komandi tveir dystirnir eru móti kappingarneytunum B36 og NSÍ og júst í verjupartinum tykist KÍ hópurin á pappírinum nakað tunnur, tá skaðar og leikbann koma. Eftir dagsins tap misti KÍ eisini oddasessin til NSÍ og eftir dystirnar sunnudagin kann KÍ koma at vera eitt stig frá 4. plássi og fimm stig frá 5. plássi í einum sera spennandi oddastríði, har tað í løtuni eru onnur lið sum síggja sterkari út enn KÍ.