Allan fyrra hálvleik var spælið ikki nakað at reypa av frá báðum pørtum. Bólturin ferðaðist nógv aftur og fram, og hóast KÍ hevði næskastu royndirnar, og eina leikliga yvirvág, so var dysturin á lívi, tá ið liðini fóru til hálvleiks.

Størsta kjansin í fyrra hálvleiki hevði Sólja Ernstdóttir, ið rakti síðuneti, eftir góða renning.

Í seinna hálvleiki tók KÍ meiri yvir, og dysturin broyttist eisini tá ið Víkingaleikarin, Arnborg Lervig, fekk reyðakort fyri tað sum sáð út til at vera hevnissøka.

Fyrst skoraði Sólja Ernstdóttir, eftir at Jancy Mohr hevði vunnið bóltin og lagt væl innfyri í fimmeturin, har Sólja kundi seta fótin á bóltin, og skorða til 1-0.

Eftir fyrsta málið bleiv spælið hjá KÍ nógv betri, og Víkingur hótti ongantíð veruliga aftur í dystin.

Málið til 2-0 gjørdi júst innskifta Birita Mohr, sum var komin á vøllin fyri Sólju Ernstdóttir. Málið kom eftir góða framlegging frá Óluvu Joensen í málinum, til Tórunn Joensen, sum setti ferð fram eftir vøllinum, og legði neyvt innfyri til Biritu Mohr, ið kundi stýra bóltin í netið til 2-0. Flott spæl og væl avsluttað av 19 ára gomlu Biritu.