Hóast forkvinnan í mentanarnevndini nú ikki vil kennast við egi barn, og gevur arkitektunum ábyrgdina av verkætlanini, so er tað júst meirilutin sum hevur umbiðið tekningar, tíðarætlanir og kostnaðarmetingar. Ynskti man aðra tíðarætlan, so kundi meirilutin lættliga umbiðið hetta.

At meirilutin ætlar at brúka 361 mió. í ítróttarøkinum, uttan at seta byggibólk við avvarandi partum og fáa neyðugu vitanina frá teimum, sum dag og dagliga eru brúkarar í økinum, er óskiljandi fyri okkum í minnilutanum.

Fleiri heildarætlanir eru gjørdar fyri økið, og áður hevur Fimleikarfelagið verið virkin partur av einum byggibólki. Hesaferð er felagið bert kunnað, men hevur als ikki verið virkin partur av arbeiðinum at menna komandi høllina.

Áðrenn býráðið visti nakað um hesa nýggju verkætlan, hevði politiska leiðslan í býráðnum kunnað feløg um teirra ætlan. Tá var tað teirra barn, men nú eigur eingin barnið.

Tað er ov lætt at siga, at sjálvandi vilja øll hava fimleikarhøll og sjálvandi vilja øll hava røttu raðfestingina, men okkara spurningurin er, hvat vilja tit?

Vit vilja gera fimleikarhøllina nú, og raðfesta 52 mió. kr. til fimleikarhøllina framum 52 mió. kr. til eina inngongd til ítróttarøkið.

Vónandi kemur meirilutin til aðra niðurstøðu á býráðsfundinum í kvøld, so hetta mál kemur á beint aftur, og vit í felag finna eina breiða semju um ítróttarøkið í býnum.

Vegna Fólkaflokkin

• Jógvan Skorheim
• Oddmar á Lakjuni
• Eyðstein Poulsen
• Fríðin Ziskason
• Atli Justinussen